Pájina aktualizada iha 08:06h, domingu 18 Dezembru

Konsellu Seguransa ONU nian ho reuniaun informal hodi ko'alia krizi rohingya nian

12 de Outubro de 2017, 22:48

Fransa ho Reinu Unidu, organiza, iha loron-sesta, reuniaun informal ida hosi Konsellu Seguransa nian kona-ba Birmánia, ho partisipasaun hosi eis-sekretáriu-jeral ONU nian Kofi Annan, autor hosi relatóriu ida kona-ba ema rohingya sira, informa hosi diplomata sira.


Reuniaun iha Nova Iorke, ne'ebé sei akontese entre tuku 20:00 no 22:00 (oras Lisboa nian) no hanesan privadu, nia objetivu maka hakarak ko'alia kona-ba situasaun ne'ebé maka akontese iha estadu Rakhine, iha oeste Birmánia nian, nune'e mós kona-ba refujiadu sira.

Hakarak haree mós oinsá komunidade internasional bele apoia aplikasaun hosi rekomendasaun hosi komisaun konsultivu ne'ebé maka prezidi ona hosi Kofi Annan, hatete hosi fonte diplomátiku ne'ebé haktuir hosi ajénsia notísia franseza AFP.

Komisaun inéditu ne'e harii iha 2016 no husu hosi xefe diplomasia no líder loloos birmaneza, Aung San Suu Kyi.

Iha 24 Agostu, bainhira publika nia relatóriu ho rekomendasaun sira, Kofi Annan apela ona ba Birmánia hodi aumenta tan direitu sira ba minoria musulmanu rohingya, tanba bele hetan sekuénsia hodi "radikaliza".

Iha loron tuirmai, tuir autoridade birmaneza sira, membru sira hosi Ezérsitu Salvasaun Estadu Rohingya nian (Arakan Rohingya Salvation Army, ARSA), ne'ebé defende direitu hosi minoria musulmanu ne'e, ataka pozisaun administrativu ofisial sira, hamosu ofensiva militar boot ida.

Relatóriu ida hosi ONU kona-ba direitu ema nian, fó sai iha loron-kuarta, refere katak kampaña represaun "sistemátiku" hasoru ema rohingya hahú halo hodi duni sai permanente minoria musulmanu hosi sira nia uma iha estadu Rakhine.

Tuir ONU, hahú hosi fulan-Agostu nia rohan, ema rohingya rihun 500 resin halai sai hosi rejiaun ne'e, ka, metade hosi komunidade, hodi buka tulun iha viziñu Bangladexe, ne'ebé moris ho kondisaun sira ne'ebé aat tebes.

Birmánia, ne'ebé 90% hosi nia populasaun hanesan budista, la rekoñese sidadania ba ema rohingya sira, hetan nafatin diskriminasaun dezde hahú violénsia sektáriu iha 2012, halo ona pelumenus ema na'in 160 mate no husik ema rihun 120 resin halai ba kampu deslokadu hamutuk 67.

Maski barak hela iha nasaun kleur ona tuir jerasaun barak nia laran, sira laiha asesu hodi hetan serbisu, laiha asesu ba eskola, ba ospital sira, no hasoru mós bandu oioin, liuliu bandu ba movimentu sira. Aumentu hosi nasionalizmu budista iha tinan hirak ikus ne'e hamosu mós aumentu ba violénsia hasoru sira, ho konfrontu sira ne'ebé dalabarak halo ema mate.

Iha nia relatóriu, komisaun ne'ebé lidera hosi Kofi Annan apela ona "ba governu hodi hametin liberdade movimentu nian ba ema tomak, la haree ba relijiaun, etnia ka sidadania", alerta ba "risku loloos hosi radikalizasaun entre komunidade rua [budista ho musulmanu] bainhira laiha solusaun lalais ba problema sira ne'ebé rejista iha estadu oeste Birmánia nian ne'e.

Hahú hosi fulan-Agostu nia rohan, Konsellu Seguransa ONU nian ladún iha reuniaun sira kona-ba krizi ema rohingya nian, minoria ida ne'ebé laiha nasionalidade ne'ebé ONU rasik konsidera hanesan etnia ida ne'ebé hetan liu perseguisaun iha mundu.

ONU husu kleur ona hodi hapara operasaun militar birmaneza sira iha oeste nasaun nian, asesu ajuda humanitáriu ba populasaun iha estadu Rakhine no ajuda fila refujiadu sira ba sira nia rejiaun orijen nian.

Iha loron hanesan ho reuniaun informal hosi Konsellu Seguransa ONU nian, sekretáriu-jeral adjuntu ONU nian ba Asuntu Polítiku sira, norte-amerikanu Jeffrey Feltman, to'o iha Birmánia hodi halo vizita ida loron haat, haktuir hosi nia komitiva iha loron-kuarta.

Durante nia vizita, "Feltman sei ko'alia kestaun urjente sira ne'e", haktuir hosi nia komitiva.

Tuir ONU, sekretáriu-jeral ONU nian, António Guterres, foin lalais ne'e hetan konviti hosi autoridade birmaneza hodi vizita nasaun ne'e, sei analiza hela nia resposta.

ho Lusa

 


Comentários

Critério de publicação de comentários