Pájina aktualizada iha 23:21h, domingu 19 Novembru

Iha Filipina Trump evita ko'alia iha públika kona-ba Duterte nia kampaña antidroga sira

13 de Novembro de 2017, 23:16

Prezidente Estadus Unidus nian, Donald Trump, evita ona, iha loron-segunda ne'e, kestaun hosi direitu ema sira nian iha nia vizita ba Filipina, rejeita halo komentáriu kona-ba kampaña antidroga kruel ne'ebé maka lansa hosi Prezidente filipinu, Rodrigo Duterte.


Trump elojia beibeik Duterte no refere ba Prezidente ho nia naran rasik, evita halo krítika ba situasaun hosi direitu ema sira nian iha nasaun ne'e. Sira na'in rua hamnasa bainhira Duterte bolu jornalista sira hanesan "espiaun".

Iha janta gala nian iha Manila ne'ebé halibur líder estranjeiru na'in 20 ne'ebé partisipa iha simeira hosi Asosiasaun Nasaun sira Sudeste Aziátiku (ASEAN) nian iha Filipina, Duterte kanta ona knananuk "Ikaw" iha dueto ho kantora Pilita Corrales, hodi hatete ba audiénsia katak halo tanba "hetan orden hosi komandante supremu Estadus Unidus nian", hodi hamosu hamnasa iha asisténsia no hamnasa ida hosi Donald Trump.

Duterte lansa ona funu kruel ida hasoru droga sira no dalabarak maka gaba katak nia oho ona ema sira. Iha tinan liubá, nia hatete liafuan ne'ebé ladún di'ak hasoru Barack Obama, ne'ebé iha tempu ne'ebá nu'udar Prezidente EUA nian.

Iha loron-segunda ne'e, durante enkontru badak ida ho jornalista sira, Trump afirma ona katak iha "relasaun di'ak ida" ho Duterte, lakohi hatán kona-ba karik ko'alia kona-ba kestaun direitu ema sira nian.

Halakon tradisaun ida hosi líder norte-amerikanu sira nian, Trump ladún obriga líder estranjeiru sira iha públiku kona-ba kestaun sira relasionadu ho direitu ema sira nian.

Ikusmai, White House informa katak líder na'in rua ko'alia ona, durante minutu 40, kona-ba organizasaun extremista Estadu Islámiku, droga ilegal sira no komérsiu bilateral. Porta-vós hosi administrasaun Trump nian, Sarah Huckabee Sanders, hatete katak direitu ema sira nian temi "lalais" de'it, iha kontextu hosi kampaña antidroga, maibé la fó detalle sira katak Trump hanesan krítiku ba asuntu ne'e.

Harry Roque, porta-vós hosi Duterte, hatete ona katak la ko'alia kona-ba direitu ema nian no ezekusaun extrajudisial sira.

Kampaña polémika hasoru narkotráfiku ne'ebé maka Duterte lansa halo ona ema rihun resin mate, ho organizasaun la'ós governu sira ne'ebé defende direitu ema nian afirma katak polísia filipina oho konsumidor sira no pasador sira droga nian, nune'e mós elementu sira hosi sira nia família.

Suspeitu sira na'in 3.900 resin maka polísia oho ona.

Kalkula ona katak númeru total hosi vítima sira ne'ebé mate aas liu na'in 9.000 bainhira tau hamutuk akontesimentu sira hosi deskonfiansa toxikodependente sira no trafikante sira ne'ebé maka duun ba ema sira ka patrulla sira hosi populasaun sira.

ho Lusa

 


Comentários

Critério de publicação de comentários