Pájina aktualizada iha 23:21h, domingu 19 Novembru

Administrador ezekutivu Banku Mundial nian iha Guiné-Bissau hodi hatete prioridade sira nasaun nian

14 de Novembro de 2017, 00:08

Administrador ezekutivu foun hosi Banku Mundial ba Áfrika, Seydou Bouda, vizita ona Guiné-Bissau hodi hatene "vizaun dezenvolvimentu" nasaun nian no saida maka hanesan prioridade hosi Governu.


"Ne'e hanesan ha'u nia vizita dahuluk ba Guiné-Bissau. Objetivu hosi vizita maka hodi hatene nia vizaun dezenvolvimentu no nia orientasaun sira kona-ba Guiné-Bissau nia prioridade", Seydou Bouda afirma ba jornalista sira.

Seydou Bouda ko'alia ba jornalista sira iha loron-domingu kalan hafoin enkontru ida ho primeiru-ministru guiniense, Umaro Sissoco Embaló, iha nia rezidénsia iha Bissau.

Hatán kona-ba pedidu sira ne'ebé halo hosi autoridade guiniense sira, administrador ezekutivu Banku Mundial nian hatete katak husu ona ba instituisaun "aumentu vantajen hosi finansiamentu públiku-privadu ba dezenvolvimentu Guiné-Bissau nian".

Ministru Finansa guiniense, João Fadiá, esplika ona katak Banku Mundial fó nafatin apoiu ida ba dezenvolvimentu nasaun nian.

Guiné-Bissau ho Banku Mundial asina ona, foin lalais ne'e, Parseria Dezenvolvimentu ida ba tinan tolu, projetu ida ne'ebé iha efeitu ba komunidade sira, no nia folin maka dolar millaun 90 (euro millaun 77 resin).

Iha marjen hosi parseria ne'e, Banku Mundial apoia hela Estadu guiniense ho dolar millaun 31 (euro millaun 26 resin) ba ligasaun hosi nasaun nian ba submarinu fibra ótika ida no disponibiliza ona dolar millaun 25 (euro millaun 21 resin) hodi apoia área hosi fornesimentu bee no enerjia nian, liuliu aumentu rede nian.

Banku Mundial apoia nafatin Guiné-Bissau ho projetu oioin, inklui hosi dezenvolvimentu rural, jestaun kosteira nian, biodiversidade no rekuperasaun ba infraestrutura sira.

ho Lusa

 


Comentários

Critério de publicação de comentários