Pájina aktualizada iha 05:53h, kinta-feira 15 Dezembru

Relatóriu: Asesu ba kontraseptivu modernu sira iha nasaun kiak sira aumenta maibé sei dook hosi objetivu

06 de Dezembro de 2017, 00:34

Númeru hosi feto sira no labarik-feto sira ne'ebé iha asesu ba métodu kontraseptivu sira iha nasaun sira hosi programa Planeamentu Familiar (FP2020) hanesan Mosambike ho Timor-Leste aumenta nafatin maibé sei dook hosi objetivu, haktuir hosi relatóriu ida ne'ebé publika iha loron-tersa ne'e.


Tuir estimativu sira ne'ebé halo hosi autor sira estudu nian "FP2020: The Way Ahead", iha Jullu tinan ne'e hosi feto no joven sira hosi nasaun 69 ne'ebé halo parte hosi FP2020 uza ona métodu ida modernu hosi kontrasepsaun.

Ne'e ekivale ba millaun 38,8 liu duké millaun 271 resin iha tinan 2012 ne'ebé uza hanesan referénsia, bainhira lansa FP2020 hanesan rezultadu hosi Simeira Londres nian kona-ba Planeamentu Familiar.

Iha momentu ne'ebá, determina ona objetivu ida hodi proporsiona métodu kontraseptivu modernu sira ba joven no feto millaun 120 resin iha nasaun sira ne'ebé kiak liu to'o tinan 2020, hodi garanti protesaun ba direitu ema nian hosi feto sira no asesu ba kuidadu saúde nian no instrumentu sira hosi planeamentu familiar nian.

Tuir relatóriu ne'ebé publika iha loron-tersa ne'e, aumentu hosi asesu entre Jullu 2016 no Jullu 2017 ba métodu kontraseptivu modernu sira, hanesan pílula, kontraseptivu sona, prezervativu sira no dispozitivu intrauterinu sira permiti evita isin-rua ne'ebé lahó planu hamutuk millaun 84, abortu ne'ebé la seguru hamutuk millaun 24 no evita ona mate hamutuk 125,000 hosi inan sira durante tuur-ahi.

Estudu indika katak Áfrika hanesan kontinente ne'ebé hatudu progresu maka'as iha área ne'e, maski, iha númeru, iha Ázia númeru hosi utilizador sira boot tanba iha kontinente ne'e inklui nasaun haat hosi nasaun lima ne'ebé iha populasaun barak liu hosi FP2020: Índia, Indonézia, Pakistaun ho Bangladexe.

"FP2020 hanesan movimentu ida lidera hosi nasaun sira hodi kapasita feto sira no joven sira hodi investe iha direitu ba planeamentu familiar. Ami fiar katak feto tomak tenki iha posibilidade hodi harii nia moris rasik", afirma hodi diretora ezekutiva hosi FP2020, Beth Schlachter, iha komunikadu ida.

Nia hatete katak planeamentu familiar "hanesan direitu báziku ida no serbisu saúde ida ne'ebé bele muda moris ho potensial hodi aselera progresu iha ita nia objetivu sira tomak dezenvolvimentu nian".

Mosambike, Guiné-Bissau, São Tomé & Prínsipe ho Timor-Leste hanesan nasaun luzófonu sira ne'ebé halo parte hosi programa ne'e no mós hosi grupu ne'ebé iha kondisaun sira hodi aselera progresu.

Iha Simeira hosi Planeamentu Familiar ne'ebé hala'o iha fulan-Jullu iha tinan ne'e, iha mós Londres, Mosambike hanesan nasaun ida hosi nasaun 33 hosi FP2020 ne'ebé maka renova ona nia kompromisu sira ne'ebé ezisti, indika objetivu foun sira, hakarak tau tan fundu públiku sira no aumentu rekursu sira hodi bele to'o ba númeru barak hosi labarik-feto sira no feto sira.

Mosambike kompromete aumenta taxa prevalénsia hosi kontraseptivu modernu sira hosi joven sira entre tinan 15 to'o tinan 19 hosi 14,1% ba 19,3% to'o tinan 2020 no hosi adolesente sira ne'ebé ativu iha nível seksual ne'ebé la'ós kaben-na'in hosi 26,7% (hosi tinan 2011) ba 50% to'o tinan 2020.

ho Lusa

 


Comentários

Critério de publicação de comentários