Pájina aktualizada iha 05:53h, kinta-feira 15 Dezembru

Liga Árabe konvoka reuniaun emerjénsia hodi ko'alia estatutu Jeruzalén nian

06 de Dezembro de 2017, 20:59

Iha loron-kuarta ne'e Liga Árabe konvoka ona reuniaun emerjénsia ida hosi ministru sira Negósiu Estranjeiru sira hosi rejiaun ne'e hodi ko'alia kona-ba intensaun Estadus Unidus nian hodi rekoñese Jeruzalén hanesan kapital Israel nian.


Konvokasaun hosi reuniaun ne'e husu hosi Jordánia, hafoin pedidu ida hosi Palestina, no hafoin Prezidente Estadus Unidus nian, Donald Trump, komunika ba líder árabe balun nia hanoin hodi muda nia embaixada hosi Telavive ba Jeruzalén.

Trump telefone ona iha loron-tersa ne'e ba liurai-mane Abdullah II hosi Jordánia, ba prezidente ejípsiu, Abdelfatah al Sisi, no ba prezidente hosi Autoridade Palestinianu nian, Mahmud Abbas, hodi hatete ba sira kona-ba desizaun ne'ebé karik sei halo ofisial iha loron-kuarta ne'e iha tuku 13:00 oras lokal.

Liga Árabe hatudu iha loron hirak ikus ne'e nia preokupasaun ho intensaun hosi Estadus Unidus, hodi konsidera katak bele "estraga prosesu tomak dame nian" no reprezenta ameasa ida ba seguransa no estabilidade iha Palestina no iha rejiaun.

Tuir fonte diplomátiku ida, ne'ebé haktuir hosi ajénsia France-Presse, reuniaun hosi Liga Árabe sei hala'o iha loron-sábadu.

Donald Trump karik sei anunsia iha loron-kuarta ne'e desizaun hodi muda embaixada, ne'ebé agora daudaun iha Telavive, hodi sai hanesan nasaun dahuluk ne'ebé maka halo asaun ne'e.

Desizaun ne'e hetan ona krítika internasional oioin no nasaun barak, hanesan Fransa, Reinu Unidu, Xina ka Portugal, hatudu ona tauk ba konsekuénsia sira, liuliu aumentu ba violénsia nian.

ho Lusa

 


Comentários

Critério de publicação de comentários