Pájina aktualizada iha 05:55h, kinta-feira 15 Dezembru

Papa defende manutensaun hosi estatutu Jeruzalén nian

06 de Dezembro de 2017, 22:48

Papa Francisco husu ona, iha loron-kuarta ne'e, respeitu ba estatutu Jeruzalén nian no "sabedoria ho prudénsia", iha tempu ne'ebé Prezidente Estadus Unidus nian prepara hodi rekoñese sidade hanesan kapital Israel nian.


"Ha'u labele hakmatek ho ha'u nia preokupasaun maka'as hasoru situasaun ne'ebé maka mosu iha loron hirak ikus ne'e" kona-ba Jeruzalén, papa hatete no la haktuir diretamente anúnsiu hosi Donald Trump.

"Ha'u husu ba ema tomak atu kompromete hodi respeita estatutu sidade nian, konforme ho rezolusaun sira hosi ONU", nia subliña durante audiénsia semanal, ba fiar-na'in millaun resin, iha Vatikanu.

Papa fó hanoin katak "Jeruzalén hanesan sidade úniku ida, lulik ba ema judeu sira, ba ema kristaun sira no ba ema musulmanu sira, ne'ebé iha fatin ne'e adora fatin lulik sira ba sira nia relijiaun ida-idak, no nia iha vokasaun espesial ida ba dame".

"Ha'u husu ba Maromak atu identidade ne'e sei prezerva no reforsadu, hodi iha benefísiu ba Rai Santa, hosi Médiu Oriente no mundu tomak, no destaka sabedoria ho prudénsia, hodi evita mosu elementu tensaun foun sira iha panorama mundial ne'ebé violentu ona no marka ona ho konflitu aat barak", nia hatete.

Tuir responsável sira hosi administrasaun norte-amerikanu, ne'ebé lakohi hatete sira nia identidade, katak Trump sei rekoñese Jeruzalén hanesan kapital Israel nian, iha anúnsiu ne'ebé marka ba tuku 13:00 (oras lokal).

Bainhira konfirma desizaun ne'e, Estadus Unidus sei sai hanesan nasaun úniku iha mundu ne'ebé maka rekoñese Jeruzalén hanesan kapital Israel nian.

ho Lusa

 


Comentários

Critério de publicação de comentários