Pájina aktualizada iha 03:03h, kuarta-feira 19 Jullu

Parlamentu luzófonu sira defende koperasaun maka'as entre membru sira CPLP

06 de Dezembro de 2017, 23:39

Parlamentu luzófonu sira defende ona koperasaun boot ida entre Estadu-membru sira hosi Komunidade Nasaun sira Lian Portugeza (CPLP) nian no nesesidade hodi envolve observador asosiadu sira, área privadu no organizasaun internasional sira seluk.


Pozisaun ne'e halo parte hosi deklarasaun final hosi Asembleia Parlamentu dahitu CPLP nian (AP-CPLP), ne'ebé hala'o iha loron-segunda no loron-tersa ne'e iha Lisboa, ho tema "Reforsu lasu institusional sira entre parlamentu sira".

"Parlamentar sira rekorda ona nesesidade hodi hametin koperasaun entre Estadu-membru sira, baze estratéjiku CPLP nian, importante ba afirmasaun hosi identidade organizasaun no reforsu hosi lasu komunitáriu sira, kultural sira, sosial sira, ekonómiku sira no polítiku sira, hodi aproveita asaun di'ak sira no esperiénsia sira susesu nian iha kontestu hosi koperasaun bilateral no serbisu ho dalan estruturadu iha kuadru multilateral", hakerek iha komunikadu ikus hosi reuniaun.

Deputadu sira hosi nasaun luzófonu sira subliña mós nesesidade hodi "envolve ator foun sira iha koperasaun, liuliu observador asosiadu sira, área privadu no organizasaun internasional sira, hodi aumenta poténsia fahe projetu sira no programa sira hosi dezenvolvimentu estratéjiku ba interese jeral nian".

Iha parte seluk, sira aponta "importánsia desizivu hosi valorizasaun no promosaun lian portugeza hanesan ligasaun jeral entre komunidade hosi nasaun-membru sira hosi CPLP no fatór afirmasaun internasional hosi luzofonia".

"AP-CPLP fó ona mandatu ba nia futura prezidénsia [ne'ebé sei kaer hosi São Tomé & Prínsipe] hodi akompaña, ho atensaun espesial, kompromisu ne'ebé estabelese hosi prezidénsia foun hosi Uniaun Interparlamentar hodi hametin lian portugeza hanesan lian ofisial hosi serbisu nian iha nível tomak hosi sira nia órgaun no komisaun sira", hatutan hosi deklarasaun final.

Dokumentu la halo referénsia ba ensinu portugés iha Guiné Ekuatorial, membru foun hosi CPLP, ne'ebé adopta lian ne'e hanesan lian ofisial iha tinan 2014, hodi kompromete aumenta nia uzu entre populasaun.

Durante reuniaun, parlamentar sira konkorda ona hodi prepara regulamentu ida hodi permiti adezaun hosi nasaun observador asosiadu sira ba Asembleia Parlamentar. Agoraa daudaun, CPLP iha observador asosiadu hamutuk 10: Jeórjia, Hungria, Turkia, Maurísia, Uruguai, Japaun, Eslovákia, Repúblika Xeka, Namíbia ho Senegal.

Iha nia rezolusaun ikus, Asembleia Parlamentar transmiti nia solidariedade ho "povu portugés, iha jeral, no liuliu ho família sira hosi vítima sira hosi katástrofe inséndiu sira ne'ebé maka akontese iha fulan sira Juñu no Outubru", no ne'ebé halo ona ema na'in 110 mate.

Órgaun ne'e rekoñese ona "dezafiu maka'as no responsabilidade boot ne'ebé maka reprezenta hosi situasaun hosi refujiadu sira no migrante millaun resin iha mundu tomak, iha kondisaun inseguransa humanu maka'as" no nia membru sira kompromete ona ho inisiativu sira hodi promove, iha kontestu rejional sira, migrasaun "regular no seguru" ida.

"Asembleia Parlamentar CPLP nian kondena ona no rejeita, lahó rezerva sira, asaun krueldade no violasaun todan sira hasoru direitu ema nian ne'ebé halo hasoru migrante sira ne'ebé mai hosi Líbia no hosi nasaun sira Áfrika subsarianu nian no ne'ebé sai hanesan difamasaun ida ba konsiénsia humanidae nian", refere mós iha pozisaun final ne'e.

ho Lusa

 


Comentários

Critério de publicação de comentários