Pájina aktualizada iha 10:39h, kuarta-feira 24 Outubru

Ministru Finansa: Timor-Leste ho duodésimu dezde inísiu tinan ne'e no 253 MUSD iha kofre

11 de Janeiro de 2018, 00:37

Hahú loron 01 Janeiru, Timor-Leste tama iha rejimi duodésimu ho limiti mensal máximu ida besik dolar millaun 114 no osan, iha kofre sira, ba "fulan rua ka fulan tolu", hatete hosi ministru Finansa ba Lusa.


"Likuidez hosi Estadu maka dolar millaun 253 resin. Osan ne'ebé hanesan resin hosi ezekusaun tinan liubá, hosi projetu balun ne'ebé seidauk selu tanba iha hela verifikasaun", Rui Gomes esplika bainhira halo deklarasaun ba Lusa iha Díli.

"Ne'e hanesan osan restu no hanesan balansu ne'ebé ami iha ba Estadu. Hafoin ne'e ami tenki halo tan levantamentu hosi Fundu Petrolíferu no tanba ne'e presiza autorizasaun hosi Parlamentu Nasional", nia afirma.

Rejimi duodesimal hanesan konsekuénsia ida prátika liu hosi susar polítiku ne'ebé nasaun hasoru iha fulan barak nia laran, ho xoke sira entre opozisaun maioritáriu - ne'ebé xumba ona programa Governu nian no Orsamentu Retifikativu - no koligasaun hosi ezekutivu.

Maski la'ós hanesan ba dala uluk maka Timor-Leste aplika rejimi duodésimu - hanesan ezemplu aplika ona durante períudu badak iha tinan 2016 no iha 2014 - karik bele halo agora, liuliu iha senáriu ida hosi eleisaun antesipadu sira, períudu ne'ebé naruk liu.

Votu antesipadu labele hala'o antes loron 22 Marsu no hafoin ne'e tenki fó fali pose ba parlamentu, ba Governu, hodi haree aprovadu programa ida Governu nian no Orsamentu Jeral Estadu nian ba tinan 2018.

Independente hosi durasaun, Ministériu Finansa halo ona dokumentu ida ne'ebé hatete ho detalle dalan oinsá aplika rejimi duodesimal, ne'ebé Rui Gomes defini, liuliu, hanesan "orsamentu kontinuidade ida" ne'ebé garante selu saláriu sira, sasán no serbisu sira, kapital dezenvolvimentu nian ba projetu sira ne'ebé hala'o daudaun no transferénsia públika sira, hanesan selu pensaun sira ba veteranu sira ka ba katuas-ferik sira.

Kontratu foun sira ka selu retroativu sira hetan suspensaun no projetu sira hosi Kapital Dezenvolvimentu nian, hanesan ezemplu, hetan liu limiti, aposta iha sira ne'ebé karik iha penalizasaun sira ba Estadu tanba la kumpri, hanesan refere iha dokumentu ne'ebé maka Lusa iha asesu.

Lisensa públiku tomak, la konta ho ANP no televizaun no rádiu públiku sira, hetan suspensaun, refere hosi testu.

Iha loron-kuarta, Ministériu Finansa sei entrega, tuir dalan simbóliku, ba Ministériu ida-idak pakote fiskal ne'ebé iha detalle kona-ba gastu ne'ebé maka ida-idak tenki halo, hodi hein autorizasaun hosi Parlamentu Nasional hodi selu gastu sira bainhira osan iha kofre sira hotu.

Funsionamentu hosi rejimi duodesimal defini iha artigu 31 hosi Lei Orsamentu no Jestaun Finanseiru, ho Lei hosi Fundu Petrolíferu determina katak parlamentu maka tenki autoriza Governu hodi asede ba fonte prinsipal hosi reseita Estadu nian.

Fernanda Lay, deputada hosi Congresso Nacional da Reconstrução Timorense (CNRT) no espesialista prinsipal ida iha kestaun orsamentu nian, esplika ona ba Lusa katak hodi hanoin iha asaun ne'e no iha nesesidade hodi "garanti sustentabilidade hosi konta públiku sira" opozisaun prepara ona autorizasaun ne'e.

"Rejimi tranzitóriu hodi halo ezekusaun duodesimal" hanesan, iha prátika, "autorizasaun ida hodi bele foti hosi Fundu Petrolíferu" tanba, fundu sira ne'ebé disponível "permiti gasta de'it to'o fulan-Fevereiru ka fulan-Marsu".

"Hafoin ne'e no tanba reseita doméstika sira ne'ebé la'ós petrolíferu nian hanesan oituan, presiza ajuda hosi Fundu Petrolíferu hodi selu Estadu to'o iha Orsamentu Jeral foun Estadu nian", nia esplika.

Portal Transparénsia, hosi Ministériu Finansa, hatudu katak taxa hosi ezekusaun orsamentu 2017 maka 88,3%, ho saldu ida ne'ebé sei ezekuta besik dolar millaun 147,46 hosi total anual besik dolar biliaun 1,39.

Parte boot, hosi konta jeral Tezouro nian, iha ezekusaun liu 98,4% hosi total ida dolar millaun 888, ho saldu ida besik dolar millaun 3,2.

Maibé, parte barak hosi valor ne'ebé sei ezekuta koresponde la'ós ba despeza hosi ministériu sira ka departamentu sira hosi Governu maibé ba empréstimu oioin hosi Fundu Infraestrutura sira nian, hala'o iha organizmu sira hanesan japuneza JICA, EXIM, BAD ka Banku Mundial.

Hosi total empréstimu sira ne'ebé sei ezekuta reprezenta kuaze dolar millaun 80 ka kuaze metadu hosi folin total ne'ebé sei ezekuta iha orsamentu tinan liubá.

Osan besik millaun 43 ne'ebé sei uza fahe hosi Ministériu oioin no entre sira destaka millaun 10,9 hosi Ministériu Solidariedade Sosial, millaun hitu resin hosi Ministériu Obra Públika, Transporte ho Telekomunikasaun nian no millaun 6,87 iha "apropriasaun sira ba Governu tomak".

ho Lusa

 


Comentários

Critério de publicação de comentários