Pájina aktualizada iha 03:19h, kuarta-feira 19 Jullu

Primeiru-ministru timoroan anunsia katak Governu hatán ba proposta sensura iha 31 Janeiru

11 de Janeiro de 2018, 23:10

Primeiru-ministru timoroan, Mari Alkatiri, anunsia iha loron-kinta ne'e katak ezekutivu sei ba Parlamentu Nasional iha loron 31 Janeiru hodi hatán ba proposta sensura ne'ebé aprezenta hosi opozisaun maioritáriu.


Iha deklarasaun sira ba jornalista sira, iha final hosi reuniaun semanal ho Prezidente timoroan, Francisco Guterres Lu-Olo, xefe ezekutivu hatete katak "konfirma ona" loron 31 Janeiru ba debate ida ne'ebé opozisaun hakarak marka dezde fulan-Novembru nia rohan.

Alkatiri insisti ona katak proposta sensura hasoru Governu "laiha méritu" no hanesan uza de'it hosi forsa sira opozisaun nian, ne'ebé kontrola fatin 35 hosi fatin 65 iha Parlamentu Nasional, hodi hamosu ezekutivu.

Iha ámbitu seluk, primeiru-ministru timoroan afirma ona katak ezekutivu seidauk kompleta mós versaun daruak hosi programa Governu nian, hafoin ida dahuluk xumba hosi opozisaun, tanba hakarak hatán ba "dúvida barak" sira hosi deputadu sira.

Forsa tolu opozisaun nian - Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) - akuza nafatin prezidente Parlamentu, Aniceto Guterres Lopes, hodi viola rejimentu tanba la ajenda plenáriu sira, inklui hodi debate proposta sensura nian no proposta ida hodi hatún responsável parlamentu nian.

Iha loron-tersa, hafoin hasoru malu tiha ho xefe Estadu, Aniceto Lopes esplika ba jornalista sira katak proposta sensura nian seidauk ajenda tanba presiza kombina loron ho ezekutivu.

"Prezidente Parlamentu labele hato'o loron ida ba Governu hodi mai hatán iha parlamentu. Tuir fundamentu, tenki iha konsertasaun ida ba loron. Hanesan kestaun ida étika nian iha relasaun institusional sira entre órgaun sira soberania nian", nia afirma.

Aniceto Lopes fó hanoin katak iha loron 18 Dezembru, iha plenáriu, anunsia fó ba Governu períudu loron útil hamutuk 30 (ne'ebé sei hotu iha fulan ne'e nia rohan) hodi hatán ba proposta sensura nian, no hakerek ona ba ezekutivu iha loron 03 Janeiru kona-ba asuntu ne'e.

Hamutuk ho karta, nia haruka pedidu ida hosi partidu ida opozisaun nian, Kmanek Haburas Unidade Nacional Timor Oan (KHUNTO), hodi nune'e bele debate proposta iha loron 08 Janeiru.

Tinan ne'e seidauk hala'o plenáriu ruma hosi Parlamentu Nasional.

Timor-Leste, iha fulan barak nia laran, hasoru hela períudu polítika ne'ebé laloos ho opozisaun, maioria iha Parlamentu Nasional, xumba programa Governu nian no proposta ida hosi Orsamentu Retifikativu, no aprezenta ona proposta ida sensura nian ba ezekutivu no proposta ida hodi hatún prezidente parlamentu nian.

Nasaun, dezde 01 Janeiru, tama iha sistema duodésimu, lahó orsamentu Estadu nian no ho nasaun nia futuru iha Prezidente timoroan nia liman laran ne'ebé, karik iha fulan ne'e nia laran, desidi katak iha ka la'e eleisaun antesipadu hodi rezolve difikuldade ne'e.

ho Lusa

 


Comentários

Critério de publicação de comentários