Pájina aktualizada iha 03:19h, kuarta-feira 19 Jullu

Prezidente timoroan defende kriasaun urjente hosi Autoridade Marítima

12 de Janeiro de 2018, 22:22

Prezidente timoroan destaka, iha loron-sesta ne'e, "urjente" hodi harii Autoridade Marítima Nasional (AMN) ida, elementu importante iha protesaun no defeza hosi rekursu tasi sira ne'ebé importante iha Timor-Leste.


"Ha'u bolu atensaun ba Governu, ho dalan espesial, urjénsia hosi prosesu konstituisaun hosi Autoridade Marítimu Nasional, importante hodi kordena dia'k liu forsa oioin no entidade sira ne'ebé envolvidu iha asaun sira defeza no seguransa nian no iha kombate ba atividade ilegal sira", deklara hosi Francisco Guterres Lu-Olo iha diskursu ida ne'ebé halo iha besik Díli.

Xefe Estadu ko'alia iha Baze Naval iha Hera iha komemorasaun sira ba tinan 16 hosi komponente naval hosi Forsa Defeza Timor-Leste (F-FDTL) nian, ne'ebé selebra loron ne'ebé Rui Pena, ministru Defeza portugués iha momentu ne'ebá, entrega ona lanxa rua, Oecusse ho Ataúro, ba autoridade timoroan sira.

Entrega marka ona prosesu regular no laiha interupsaun hosi apoiu Portugal nian ba komponente naval no ba komponente sira seluk hosi F-FDTL iha tinan 16 ikus ne'e.

Iha serimónia ne'ebé simu lanxa hodi Estadu timoroan nia naran, Prezidente Taur Matan Ruak, iha momentu ne'ebá, dekreta ona loron 12 Janeiru hanesan "loron komponente naval hosi FDTL nian".

Tanba ne'e, Prezidente timoroan destaka ona "apoiu fundamental" hosi Portugal iha kriasaun hosi komponente naval no, hahú hosi momentu ne'ebá, asisténsia hosi mós nasaun sira hanesan Austrália, Indonézia, Papua Nova Guiné no Estadus Unidus.

"Investimentu nasaun nian iha dezenvolvimentu hosi komponente naval iha devolusaun boot la'ós de'it iha planu militar maibé iha mós reforsu dame no dezenvolvimentu sosial no ekonómiku", nia konsidera.

Serimónia sira akontese ho prezensa mós hosi ministru Defeza ho Seguransa José Sequeira Somotxo, hosi komandante F-FDTL, major-jeneral Lere Anan Timur, hosi membru sira Estadu-Maior-Jeneral no hosi komandante Komponente Naval, kapitaun-fragata Adão Brito, no konvidadu sira seluk.

Lu-Olo hanoin hikas katak kriasaun hosi komponente naval "hanesan asaun ho importánsia boot iha afirmasaun hosi soberania nasional", no akontese antes hosi restaurasaun independénsia rasik, iha loron 20 Maiu 2002.

"Kapasidade hosi forsa sira hodi dezenvolve valénsia naval hanesan sinal ida loloos hosi determinasaun no vontade ema timoroan sira nian hodi proteje teritóriu nasional no rikusoin natural sira nasaun nian", nia hatete.

Maski iha área marítimu ida ne'ebé boot tebes duké teritóriu terestre, Timor-Leste iha nafatin frakeza iha protesaun ba tasi sira liuliu kona-ba rekursu sira peska nian.

Lu-Olo fó hanoin katak "rekursu sira tasi nian iha knaar ida ho importánsia maka'as iha rikusoin povu sira nian"no tasi, liuliu tanba petróleu ho gás natural iha Tasi Timor, "sai nafatin hanesan fonte estratéjiku ida hosi rikusoin nian".

Fundu Petrolíferu agora daudaun hanesan fonte prinsipal hosi reseita públika no, tanba Estadu timoroan hanesan fonte ekonómiku prinsipal, nune'e sai hanesan motor prinsipal ekonomia nian.

Xefe Estadu lembra katak rikusoin petrolíferu ne'e "tenki uza ho kuidadu no ho atensaun ba futuru", liuliu tanba la'ós renovável, nia refere mós ba rikusoin sira seluk: hahú hosi peska to'o turizmu no ambiente.

"Protesaun hosi kualidade ambiente nian no utilizasaun sustentável hosi rekursu natural sira, iha rai no iha tasi, hanesan fatór estratéjiku ida ba dezenvolvimentu ekilibradu hosi ekonomia nasional no aumentu empregu no moris di'ak nian, iha área turizmu, iha peska no mós iha área sira seluk", Lu-Olo hatete.

"Komponente naval FALINTIL-FDTL nian hanesan instrumentu nesesáriu hodi hametin protesaun hosi rikusoin sira ne'e no ajuda autoridade sivil sira hodi fiskaliza utilizasaun sustentável hosi rikusoin sira ne'e inklui, bainhira presiza, hodi determina respeitu hosi lei sira Timor-Leste nian hosi utilizador sira hosi ita nia tasi sira", Lu-Olo afirma.

"Presiza atu kontinua sai nafatin to'o ohin loron hanesan instrumentu sira Estadu nian hodi promove utilizasaun hosi rikusoin sira ne'e ba serbisu interese nasional nian", nia hatete.

Ba Lu-Olo, F-FDTL no komponente naval "la'ós hanesan de'it fatór protesaun soberania nasional nian, maibé mós fatór sira dezenvolvimentu iha protesaun ambiental, iha sustentabilidade ekonomia tasi nian no iha seguransa rejional".

ho Lusa

 


Comentários

Critério de publicação de comentários