Pájina aktualizada iha 01:23h, tersa-feira 25 Abril

Bloku partidu timoroan sira husu ba Prezidente hodi konvoka Parlamentu

13 de Janeiro de 2018, 00:20

Bloku ida hosi partidu sira ne'ebé laiha reprezentasaun parlamentar husu, iha loron-sesta ne'e, ba Prezidente timoroan hodi konvoka sesaun estraordináriu ida hosi Parlamentu Nasional hodi evita situasaun ida ne'ebé prejudika Estadu direitu no demokrasia.


Fórum Demokrátiku Nasional (FDN), ne'ebé halo parte hosi reprezentant sira hosi forsa polítika oioin timoroan nian, akuza ona prezidente Parlamentu Nasional hodi "iha dalan oioin no abuzu hodi impede funsionamentu adekuadu hosi órgaun soberania ida Estadu nian", haktuir hosi komunikadu ida ne'ebé haruka ba ajénsia Lusa.

Ne'e implika atu Parlamentu "labele kumpri sira nia funsaun ho dalan demokrátiku ida", nune'e justifika intervensaun urjente ida hosi Prezidente Timor-Leste nian, Francisco Guterres Lu-Olo.

"FDN konvida Prezidente Repúblika hodi konvoka lalais, antes loron 18n Janeiru, sesaun plenáriu estraordináriu ida hosi Parlamentu Nasional, ho baze hosi artigu 86 hosi Konstituisaun no apela ba Prezidente Repúblika hodi auta hodi nune'e labele permiti produsaun presedente konstitusional sira no legal sira ne'ebé prejudika Estadu direitu no demokrasia nian", hatutan.

Bloku "lembra ba Prezidente katak regra sira ne'ebé governa luta konstitusional ba kbiit polítiku iha nasaun ne'e hetan ona akordu hosi ema tomak liuhosi sira nia reprezentante iha Asembleia Konstituinte", nia refere.

Artigu 86 hosi Konstituisaun, ne'ebé defini kompeténsia sira hosi xefe Estadu, hatete katak Prezidente bele "eziji konvokasaun estraordináriu hosi Parlamentu Nasional, bainhira justifika hosi razaun autoritáriu sira hosi interese nasional nian".

FND halibur reprezentante sira hosi Partidu Unidade ho Dezenvolvimentu Demokrátiku (PUDD), União Democrática Timorense (UDT), Frente Mudansa (FM), Bloku hosi Unidade Popular (BUP), Partidu Sosialista Timor nian (PST), Partidu Sosial Demokrata (PSD), Partidu Republikanu (PR), Partidu Dezenvolvimentu Nasional (PDN) ho Partidu Demokrata Kristaun (PDC).

Iha nota hanesan, FDN hatutan katak hakarak "kontribui ho ideia sira hodi ajuda Prezidente Repúblika hodi ultrapasa no rezolve difikuldade polítika no konstitusional atual", hodi konsidera katak iha "direitu no obrigasaun" hodi reprezenta sé maka vota ona iha sira iha eleisaun lejislativu sira iha tinan liubá.

Bloku akuza ona Governu minoritáriu, hosi koligasaun entre Frente Revolucionária do Timor-Leste Independente (Fretilin) ho Partidu Demokrátiku (PD), katak halo, iha fulan haat ikus ne'e, tentativa ida hodi "justifika no defende nia kbiit ho dalan ida ne'ebé la konsistente ho prinsípiu parlamentar sira ne'ebé estabelese" iha Konstituisaun.

Situasaun ida "ne'ebé iha konsekuénsia todan sira ba moris sosial no ekonomia Timor-Leste nian" no ba ema timoroan sira, konsidera.

"FDN fiar katak Governu minoritáriu labele kaer sira nia knaar hanesan sira hanoin no antesipadu hosi ema tomak iha Timor-Leste. Bainhira situasaun ne'e la rezolve, sei prejudika nafatin populasaun tomak Timor-Leste nian", hatutan.

"FDN entende loloos katak danifikasaun hosi kondisaun ekonómiku sira sei kontinua prejudika dezenvolvimentu material no imaterial hosi Timor-Leste", hatutan mós.

Timor-Leste, iha fulan barak nia laran, hasoru hela períudu polítika ne'ebé laloos ho opozisaun, maioria iha Parlamentu Nasional, xumba programa Governu nian no proposta ida hosi Orsamentu Retifikativu, no aprezenta ona proposta ida sensura nian ba ezekutivu no proposta ida hodi hatún prezidente parlamentu nian.

Nasaun, dezde 01 Janeiru, tama iha sistema duodésimu, lahó orsamentu Estadu nian no ho nasaun nia futuru iha Prezidente timoroan nia liman laran ne'ebé, karik iha fulan ne'e nia laran, desidi katak iha ka la'e eleisaun antesipadu hodi rezolve difikuldade ne'e.

Iha loron 31 Janeiru, Governu sei hatán iha Parlamentu Nasional hasoru proposta sensura opozisaun nian.

ho Lusa

 


Comentários

Critério de publicação de comentários