Pájina aktualizada iha 20:43h, kuarta-feira 15 Agostu

Komisaun Permanente hosi parlamentu timoroan hasoru malu ba dala uluk hafoin disolusaun

08 de Fevereiro de 2018, 22:50

Sala hosi plenáriu Parlamentu Nasional nian, ne'ebé sobu iha loron 26 Janeiru, iha loron-kinta ne'e simu fali reuniaun ida, dala uluk dezde fulan-Dezembru, ho membru sira hosi Komisaun Permanente analiza aspetu oioin hosi situasaun polítika.


Kestaun sira hanesan impaktu hosi sobu parlamentu iha kbiit sira parlamentu nian no Governu nian, troka krítika sira entre partidu sira, akuzasaun hodi sosa votu sira no pontu orden beibeik no "defeza onra" marka ona oras barak debate nian.

Prezidente Repúblika, Francisco Guterres Lu-Olo, anunsia iha loron 26 Janeiru disolusaun parlamentu nian no konvokatóriu ba eleisaun antesipadu - seidauk iha loron markadu - hanesan solusaun ba problema polítiku ne'ebé maka nasaun hasoru.

Lei timoroan determina katak bainhira iha disolusaun sei hahú funsiona Komisaun Permanente Parlamentu Nasional nian, harii hosi elementu total ida hamutuk 29.

Papel hosi Komisaun Permanente Parlamentu Nasional nian fiksa iha Konstituisaun no mós iha rejimentu parlamentar, ho testu sira esplika katak funsiona "durante períudu ne'ebé maka sobu Parlamentu Nasional, iha intervalu sira sesaun nian no iha kazu sira seluk ne'ebé previstu iha Konstituisaun".

Komisaun prezidi hosi prezidente Parlamentu Nasional no kompostu hosi visi-prezidente sira ho deputadu sira ne'ebé maka hili hosi partidu sira, iha kazu ne'e partidu lima ho fatin iha parlamentu.

Entre sira nia knaar, Komisaun Permanente - ne'ebé hahú funsiona dezde sobu parlamentu tuir dekretu hosi Prezidente Repúblika iha loron 26 Janeiru - tenki akompaña atividade Governu no administrasaun, kordena atividade hosi komisaun sira parlamentu nian no konvoka parlamentu "bainhira iha nesesidade".

Prepara ho organiza sesaun sira Parlamentu Nasional nian, autoriza deslokasaun sira hosi xefe Estadu nian, diriji relasaun sira ho parlamentu sira hosi nasaun sira seluk no autoriza deklarasaun Estadu sítiu nian no Estadu emerjénsia nian hanesan mós knaar sira seluk.

Debate loron-kinta nian hahú ho proposta ida ne'ebé aprezenta hosi bankada sira opozisaun nian hodi muda deliberasaun tinan 2008 nian ne'ebé regula Komisaun Permanente, tanba konsidera katak disolusaun parlamentu ne'ebé hasoru daudaun hanesan situasaun ida ne'ebé "la hanesan" ho situasaun ne'ebé akontese iha tempu ne'ebá, ne'ebé komisaun "funsiona de'it iha períudu suspensaun nian".

Ba CNRT, komisaun, iha kazu disolusaun nian, "tenki funsiona iha tempu barak liu" duké iha kazu interupsaun nian, nune'e presiza muda deliberasaun hodi reflete nesesidade hodi "aumenta nia mandatu".

Fretilin protesta ideia hodi argumenta katak Konstituisaun no rejimentu kalkula ona katak Komisaun Permanente funsiona iha kazu sobu parlamentu, nune'e la presiza mudansa ba deliberasaun.

Aniceto Guterres Lopes, prezidente Parlamentu Nasional nian, rekorda katak kompeténsia komisaun nian defini iha Konstituisaun no labele "inventa" mudansa ba desizaun sira ne'ebé foti hosi plenáriu parlamentu nian.

Kalkula katak Prezidente Repúblika anunsia iha semana ne'e loron eleisaun antesipadu nian ne'ebé maka órgaun eleitoral sira hato'o atu hala'o iha loron 12 Maiu.

ho Lusa

 


Comentários

Critério de publicação de comentários