Pájina aktualizada iha 15:04h, segunda-feira 19 Fevereiru

Ministra timoroan kritika tentativa divizaun iha pré-kampaña eleitoral

09 de Fevereiro de 2018, 01:07

Ministra Justisa timoroan, Maria Ângela Carrascalão, kritika ona sé maka iha fulan hirak ikus ne'e tenta fahe sosiedade timoroan, hodi buka iha pré-kampaña ba eleisaun antesipadu sira hamosu fali debate antigu sira, inklui entre sira ne'ebé "iha laran no sira ne'ebé iha liur".


"Ha'u la gosta diskursu ida hanesan ne'e. Liuliu bainhira ko'alia hodi haketak entre ema sira ne'ebé iha liur no iha laran. Nune'e maka mosu problema sira entre ema lorosa'e (hosi leste) no loromonu (hosi oeste), entre ema mutin sira no ema mestisu sira, entre sira ne'ebé orijináriu ho sira ne'ebé maka iha akizisaun", nia hatete ba ajénsia Lusa.

"Bainhira laiha ona argumentu, sira kaer iha asuntu ne'e hodi fahe ema timoroan sira. Ha'u fiar atu ne'e hanesan dalan di'ak ida. Ami presiza iha étika no la'ós ataka malu. Nasaun nia futuru eziji atu labele haketak malu", nia konsidera.

Tensaun polítika ne'ebé maka Timor-Leste hasoru iha fulan barak nia laran hamosu fali debate antigu sira iha sosiedade timoroan nian, ho rede sosial sira marka ho referénsia sira kona-ba diferensa sira entre frente armada ho frente diplomátiku hosi luta hasoru okupasaun indonézia.

Militante balun ne'ebé iha ligasaun ba partidu sira opozisaun nian no to'o artigu balun iha imprensa timoroan sujere atu eleisaun antesipadu, ne'ebé previstu ba fulan-Maiu, tau hamutuk mane sira hosi frente armada, hanesan Xanana Gusmão ho Taur Matan Ruak - líder sira hosi partidu boot opozisaun nian, CNRT [Congresso Nacional da Reconstrução Timorense] ho PLP [Partidu Libertasaun Popular] -, no líder sira hosi frente diplomátiku, hanesan Mari Alkatiri ho José Ramos-Horta, hamutuk iha Governu.

Maria Ângela Carrascalão, ne'ebé hanesan militante hosi União Democrática Timorense (UDT) no halo parte iha Governu konstitusional dahitu, hatete katak nia partisipasaun iha Governu - lidera hosi Frente Revolucionária do Timor-Leste Independente (Fretilin) ho Partidu Demokrátiku (PD) - hanesan sinal hosi importánsia hodi timoroan sira atu serbisu hamutuk.

"Señór primeiru-ministru Mari Alkatiri fó lisaun di'ak ida. Hanesan asaun ida korajen nian hodi hili ha'u. Ema hotu hatene katak ami la'ós mai hosi partidu hanesan maibé, maski nune'e, nia fó votu konfiansa ne'e mai ha'u. Hanesan hakat sira ne'ebé di'ak. Timor la presiza divizaun", nia afirma.

"Ita labele ko'lia aspetu susar ne'e kona-ba sé maka iha laran ka iha liur. Ka sira ne'ebé iha liur maka sira ne'ebé iha de'it Portugal, iha Áfrika ka iha Austrália? No sira ne'ebé maka iha Indonézia? Sira mós iha estranjeiru. Tanba ne'e ita tenki para iha ne'e", nia afirma.

Eleitor timoroan sira ba vota fali iha fulan-Maiu, menus fulan sanulu hafoin vota tiha hodi hili membru na'in 65 ba Parlamentu Nasional ne'ebé maka sobu ona hahú hosi loron 26 Janeiru.

ho Lusa

 


Comentários

Critério de publicação de comentários