Pájina aktualizada iha 15:04h, segunda-feira 19 Fevereiru

Governu timoroan hakarak rede fibra ótika no hadi'a iha fornesimentu elétriku

09 de Fevereiro de 2018, 01:55

Primeiru-ministru timoroan, iha loron-kinta ne'e, defende ona nesesidade hodi avansa ho rede fibra ótika ida iha nasaun no hadi'a kualidade hosi fornesimentu elétriku, hanesan hakat importante ba implementasaun maka'as hosi teknolojia informasaun nian iha nasaun.


Mari Alkatiri ko'alia iha Díli iha serimónia integrasaun hosi sistema rua hodi automiza pagamentu sira Estadu nian ba área sira seluk, hanesan "hakat ida" hodi hametin "interasaun ne'ebé maka'as liután entre sidadaun ho Estadu".

Nia hatete katak akordu ne'ebé hetan iha loron-kinta ne'e hanesan "hakat importante ida iha dezenvolvimentu hosi administrasaun públika no hosi sistema finanseiru Timor-Leste nian" reprezenta "integrasaun kompleksa ida hosi sistema sira hodi automiza pagamentu sira Estadu nian".

Ho sistema foun, entidade estatal importante tolu - Ministériu Planu ho Finansa, Banku Sentral ho banku públiku BNCTL - iha ona ligasaun entre sira no ho área bankáriu komersial no mós ho sidadaun sira ho empreza sira.

Serbisu ida hosi tinan barak nia laran hodi hetan "marka importante" ne'ebé ajuda kria Governu ida "unidu no integradu" no ne'ebé permiti kordena di'ak fluksu efetivu hosi informasaun "iha entidade governamental sira nia laran no mós iha liur".

"Hanesan hakat importante sira ba funsionamentu di'ak hosi Governu no Estadu iha parte tomak. Reforma sei kontinua no hadi'a jestaun hosi finansa sei hamosu iha Tezouro ne'ebé efisiente liu ho transparénsia maka'as liu", Alkatiri hatete.

"Hanesan evolusaun boot ida ne'ebé permiti atu Estadu kumpri nia obrigasaun sira iha tempu ne'ebé di'ak. No iha futuru sei permiti atu sidadaun sira no empreza sira kumpri sira nia obrigasaun ba Estadu, hodi selu impostu sira no serbisu sira seluk", nia esplika.

Alkatiri rekorda katak integrasaun hosi sistema sira kontribui mós ba promosaun hosi dezenvolvimentu ekonómiku no sosial Timor-Leste nian, ne'ebé "área privadu hanesan foun hahú no ekonomia depende liu ba injesaun hosi rekursu públiku sira ne'ebé mai hosi esplorasaun hosi rekursu natural sira".

No mós hanesan hakat ida iha dezenvolvimentu hosi sistema finanseiru, permiti manán efisiénsia no hamenus dependénsia maka'as iha nota sira no osan-besi iha nasaun.

Alkatiri hatete katak hanesan hakat adisional iha esforsu redusaun nian sei hahú iha tempu badak sistema ida hodi selu retallu ne'ebé permiti "inkluzaun finanseiru hosi populasaun barak".

Nia hatete, iha nível global, medida sira ajuda kria kondisaun di'ak sira ba área privadu, nasional ho estranjeiru, ne'ebé sei ajuda estimula investimentu ne'ebé presiza hodi diversifika ekonomia ho dezenvolve nasaun.

Alkatiri hatete katak Governu - ne'ebé agora daudaun iha jestaun - iha nia programa iha prepasaun ba "eskema ida hosi garantia parsial hosi risku kréditu nian" hodi ajuda empreza sira ho sidadaun sira hodi iha asesu fásil ba kréditu.

ho Lusa

 


Comentários

Critério de publicação de comentários