Pájina aktualizada iha 11:17h, sabado 15 Dezembru

Ema rihun resin simu Xanana Gusmão iha Díli hafoin tratadu fronteira nian ho Austrália

13 de Março de 2018, 00:43

Ema rihun resin simu ho festa líder istóriku timoroan Xanana Gusmão ne'ebé fila iha loron-domingu ne'e ba Timor-Leste hafoin auzénsia ida durante fulan neen no hafoin asinatura hosi tratadu foun ba fronteira tasi ho Austrália.


Negosiador prinsipal hosi tratadu, Xanana Gusmão to'o iha Díli iha aviaun ida ne'ebé mai hosi Bali, Indonézia, tuun iha aeroportu kapital timoroan nian, ne'ebé iha membru oioin hosi Governu, deputadu sira no dirijente partidáriu sira maka hein hela.

Entre dirijente nasional sira, iha destake ba prezidente hosi Partidu Libertasaun Popular (PLP), Taur Matan Ruak, no fundador hosi Kmanek Haburas Unidade Nacional Timor Oan (KHUNTO), José Naimori.

Partidu rua ne'e, hamutuk ho Congresso Nacional da Reconstrução Timorense (CNRT), ne'ebé prezidi hosi Xanana Gusmão, harii ona koligasaun pré-eleitoral ida ne'ebé sei aprezenta iha eleisaun lejislativu antesipadu iha loron 12 Maiu.

Maski iha prezensa hosi dirijente oioin hosi partidu tolu nian maibé laiha símbolu partidáriu ruma ne'ebé maka lori iha aeroportu no mós durante karavana naruk iha sidade, haree de'it bandeira timoroan nian no estrutura sira hosi rezisténsia hasoru okupasaun Indonézia nian iha Timor-Leste, inklui organizasaun juvenil Renetil no asosiasaun veteranu sira nian.

CNRT fó sai kona-ba regresu Xanana Gusmão nian iha loron-sábadu no iha loron-domingu ne'e "tanba motivu seguransa nian" husik apelu ba nia militante sira hodi la uza símbolu polítiku-partidáriu sira.

Hafoin, ho Xanana ho bandeira timoroan boot ida iha liman, hamriik, iha karreta ida - halo perkursu tomak ho parte superior isin nian sai hosi jipe ida ne'ebé lori nian - iha karavana ne'ebé haleu sidade.

Aleinde motor sira nia lian, rona mós viva maka'as ba mane ida ne'ebé iha tinan hirak ikus ne'e sai hosi "maun boot" ba "avó Nana" (diminuitivu hosi nia naran) maibé rekoñesidu hanesan aman nasaun nian no agora ba fronteira marítima nian.

Barak liu lori motor, balun ho família tomak - balun okupante na'in tolu ka haat - ema timoroan sira haleu Avenida Nicolau Lobato, prinsipal iha Díli, iha barullu selebrasaun ne'ebé hotu iha sede CNRT nian.

Xanana Gusmão hato'o ona agradesimentu oioin no rekadu sira - hodi hatete katak ikusmai maka sei fó esplikasaun sira detalladu liu kona-ba tratadu istóriku tanba kompleksidade hosi negosiasaun ho Austrália - no saida maka sei falta negosia hosi termu sira dezenvolvimentu hosi posu Greater Sunrise nian.

Mensajen sira nia hato'o kona-ba oinsá maka ema timoroan sira hasoru tensaun polítika iha fulan hirak ikus ne'e, agradese ona ba ema tomak ne'ebé reza ona hodi nune'e Timor-Leste hakotu ona tratadu, no husik rekadu balun hodi hanoin iha eleisaun iha fulan-Maiu.

La tama iha mensajen diretu sira ba populasaun - "diresaun sira hosi partidu sira agora sei halo reuniaun" - Xanana Gusmão husu ona atu rede sosial sira uza ho dalan "konstrutivu liu" iha prosesu hosi "konstrusaun Estadu no konsoliasaun demokrátiku" ne'ebé hala'o daudaun.

Líder partidáriu agradese ona serbisu ne'ebé halo hosi dirijente sira no kuadru sira hosi partidu tolu hodi hetan "plataforma hanesan" no avansa ho AMP no hatete katak agora tenki "serbisu, serbisu, serbisu" ba eleisaun sira.

Nia hatete katak partidu sira "tenki aprende ho sala sira" no tenki "atua nafatin hodi defende povu nia interese".

ho Lusa

 


Comentários

Critério de publicação de comentários