Pájina aktualizada iha 04:32h, tersa-feira 26 Setembru

ONU: Asaun oho nian iha Síria kontinua "lahó moe, desénsia ka responsabilidade"

14 de Março de 2018, 00:40

Komisaun ONU nian ne'ebé dokumenta krimi sira funu nian iha Síria lamenta ona, iha loron-tersa ne'e, katak asaun oho ema síriu sira "kontinua lahó moe ida, lahó desénsia ka responsabilidade, iha loron rua antes hanoin hikas tinan hitu ba inísiu konflitu nian.


Prezidente hosi komisaun ne'e, jurista brazileiru Paulo Sérgio Pinheiro, aprezenta ona iha loron-tersa ba Konsellu Direitu Ema nian iha ONU nia relatóriu foun liu kona-ba violasaun sira hosi direitu fundamental sira ne'ebé halo iha Síria dezde fulan-Jullu tinan liubá.

Responsável deskreve situasaun ne'ebé maka hasoru ohin loron iha rejiaun Ghouta oriental, fatin defeza rebelde nian besik Damasku ne'ebé hetan ofensivu maka'as hosi forsa governamental síriu sira maibé nia rekorda katak "krueldade sira ne'e la'ós foin maka akontese".

Paulo Sérgio Pinheiro lembra katak hanesan nia aprezentasaun ba dala 23 hosi relatoriu ida ba ONU no lamenta ona katak esperansa tomak ne'ebé mosu fali iha tinan liubá nia rohan kona-ba final hosi violénsia lakon ona ho aumentu hosi konflitu.

Nia lamenta ona katak laiha respeitu ba autoridade hosi Konsellu Seguransa ONU nian, hodi rekorda violasaun hosi sesarfogu ne'ebé dekreta iha loron sanulu liubá hodi permiti asesu humanitáriu seguru ba Ghouta oriental.

"Ema moras no kanek atus resin nia kondisaun sai aat bainhira hein posibilidade ida hosi evakuasaun médiku. Balun ne'ebé iha lista hosi kazu todan sira ba evakuasaun mate ona", Pinheiro hatete.

Komisaun refere mós ba situasaun iha Afrine, sidade hosi noroeste Síria nian ne'ebé kontroladu hosi milísia kurdu síriu, Unidade Protesaun Povu nian (YPG), ne'ebé ezérsitu turku lansa ona ofensivu ida iha loron 20 Janeiru.

Iha ema hamutuk 320.000 maka hela daudaun iha fatin ne'e, inklui deslokadu internu hamutuk 125.000.

Kona-ba provínsia Idleb, úniku ne'ebé sei iha kontrolu hosi grupu rebelde sira no ne'ebé iha populasaun millaun rua resin, Pinheiro kondena ona atake hasoru infraestrutura importante sira ba sobrevivénsia hosi ema sivil sira nian liuliu hasoru ospital sira.

Hafoin intervensaun hosi Paulo Sérgio Pinheiro, embaixador síriu nian iha ONU iha Jenebra, Hussam Edin Aala, rejeita ona alegasaun sira hosi Komisaun no akuza ona Konsellu Direitu Ema nian hodi promove "kampaña ida hodi estraga Governu síriu nia imajen".

ho Lusa

 


Comentários

Critério de publicação de comentários