Pájina aktualizada iha 12:32h, sabado 22 Setembru

Governu australianu lori tratadu fronteira nian ho Timor ba parlamentu hodi ratifika

29 de Março de 2018, 22:22

Ministra Negósiu Estranjeiru australianu aprezenta ona, iha semana ne'e, tratadu fronteira tasi nian, ne'ebé asina iha loron 06 Marsu ho Timor-Leste, iha parlamentu Austrália nian hodi hahú prosesu ratifikasaun, informa hosi nia gabinete iha loron-kinta ne'e.


Prosesu ratifikasaun hosi parlamentu hosi nasaun rua nian hanesan importante hodi hahú hala'o tratadu istóriku ne'ebé maka Bishop asina ona iha Nova Iorke ho ministru timoroan Agio Pereira, hodi Timor-Leste nia naran, no ne'ebé defini ho dalan permanente fronteira tasi entre nasaun rua ne'e.

Vontade hosi Governu australianu maka atu parlamentu bele vota tratadu ne'e "durante tinan ne'e" hodi hahú prosesu preparasaun ba "lejislasaun hosi implementasaun" no serbisu ho Timor-Leste no ho empreza sira ne'ebé halo operasaun iha Tasi Timor hodi hakotu prosesu tranzitóriu relasionadu ho mudansa ne'ebé maka hatete iha tratadu.

Iha konkretu, hanesan ezemplu, tratadu implika atu Timor-Leste simu 100% - agora simu 90% no Austrália simu 10% - hosi reseita sira ne'ebé hetan hosi posu ativu sira iha rejiaun, liuliu Bayu Undan.

Iha komunikadu ne'ebé fó sai iha loron-kinta ne'e, Governu australianu esplika katak Austrália iha empeñu atu futuru Timor-Leste nian bele "estável ho prósperu", tanba ne'e apoia nia aspirasaun sira hodi "hetan nia potensial ekonómiku".

Tanba ne'e, iha aprezentasaun hosi tratadu iha parlamentu, Bishop refere ona ba aspetu ne'ebé seidauk rezolve, liuliu kona-ba dezenvolvimentu hosi kampu petrolíferu Greater Sunrise, ne'ebe maka seidauk iha akordu ida.

"Ami rekoñese katak dezenvolvimentu [hosi Greater Sunrise] sei lori benefísiu importante sira, liuliu ba Timor-Leste. Ami senti ansiozu hodi kolabora ho Timor-Leste, bainhira serbisu ho empreza sira hosi joint venture hodi hetan dalan komersial ida di'ak hodi dezenvolve Greater Sunrise", Bishop hatete.

"Tratadu hanesan konkista istóriku ida ba Austrália ho Timor-Leste. Ami rezolve ona problema naruk ida, ami estabelese ona limiti marítimu permanente sira ho lansa ona baze sira ba kapítulu foun ida iha ami nia relasionamentu ho ami nia viziñu ida ne'ebé besik liu", Bishop esplika iha nia deklarasaun ba parlamentu.

"Hanesan ezemplu ida ho valor no importánsia hosi direitu internasional hodi rezolve problema sira no diverjénsia sira entre estadu sira liuhosi negosiasaun pasífiku sira. Hanesan ami hatete ona iha dokumentu hosi Austrália kona-ba Polítika Externa, ne'ebé divulga iha tinan liubá, katak Austrália fiar atu orden internasional ho baze iha regra sira hanesan fundamental ba ita nia seguransa no prosperidade koletivu sira", nia hatutan mós.

Bishop destaka "vontade di'ak no kompromisu hosi nasaun rua durante negosiasaun sira", felisita mós "knaar importante" hosi komisaun konsiliasaun independente ne'ebé halo negosiasaun sira hetan tratadu ida.

Prosesu ratifikasaun hosi tratadu hosi parte Parlamentu Nasional Timor-Leste nian karik sei akontese de'it hafoin tomada pose ba deputadu sira ne'ebé sei eleitu iha eleisaun loron 12 Maiu oinmai.

ho Lusa

 


Comentários

Critério de publicação de comentários