Pájina aktualizada iha 12:32h, sabado 22 Setembru

Timor-Leste/Eleisaun: Númeru rekord ba eleitor sira vota iha eleisaun antesipadu 12 Maiu

09 de Abril de 2018, 19:34

Númeru aas hosi eleitor sira, liu rihun 790, sei bele vota iha eleisaun lejislativu antesipadu iha loron 12 Maiu iha Timor-Leste, ne'ebé rihun 30 tama iha kadernu eleitoral sira dezde votasaun fulan-Juñu 2017 nian.


Informasaun provizóriu ne'ebé maka fó sai iha loron-segunda ne'e hosi Acilino Manuel Branco, diretor-jeral hosi Sekretariadu Tékniku ba Adminitrasaun Eleitoral (STAE), ne'ebé hatete ba Lusa katak iha eleitor foun rihun 30, katak rihun tolu resin halo parte iha kadernu eleitoral sira iha estranjeiru.

"Maski iha períudu badak ida ba resenseamentu, hetan interese maka'as no ami simu eleitor foun sira hamutuk rihun 30 resin", Acilino Manuel Branco hatete.

Iha entrevista ba Lusa, diretor-jeral afirma ona kata aumentu hosi númeru eleitor sira hanesan pozitivu.

"Hanesan sinal pozitivu ida katak ami bele iha tan partisipasaun, maibé agora importante maka ema hotu kumpri sira nia parte, inklui informasaun síviku ba eleitor sira, hodi nune'e ema hotu bele ba vota", nia hatutan.

Acilino Manuel Branco adianta ona katak prepasaun sira ba votu sei hala'o nafatin.

Iha loron-segunda ne'e, ekipa sira STAE nian kontinua prepara material, inklui kartaz sira ho informasaun kona-ba votu, hodi fahe iha Timor-Leste no iha nasaun sira ne'ebé bele hala'o direitu votu iha estranjeiru.

"Buat hotu besik hotu ona. Ami besik hakotu preparasaun hosi material ne'ebé la sensível, inklui urna sira ho tinta, ne'ebé ami hahú fahe ona iha munísipiu sira. Iha tempu badak sei to'o iha urna sira liuhosi apoiu hosi Governu xinés", nia hatutan.

Ema besik rihun 12 - konta ho funsionáriu permanente sira hosi STAE - envolve iha prosesu eleitoral, ho na'in 30 iha nível nasional, iha Díli, no númeru hanesan iha kapital ida-idak hosi munisípiu no iha enklave Oecusse-Ambeno, ba kordenasaun.

Hamutuk funsionáriu na'in 130 iha postu ida-idak hosi postu administrativu hamutuk 67 iha nasaun laran ne'ebé sei halo ligasaun entre munisípiu sira no suku sira.

Destaka mós brigada sira hamutuk na'in 837 resin iha sentru ida-idak votasaun nian no liu na'in 10 iha estasaun votu ida-idak. Tau hamutuk ba valor ne'e funsionáriu sira ne'ebé sei akompaña prosesu iha estranjeiru, liuliu iha Austrália, Koreia-Súl, Reinu Unidu ho Portugal.

Kona-ba boletin sira votu nian, modelu sei debate iha enkontru ida iha loron-tersa, loron dahuluk kampaña nian, ho responsável sira hosi STAE no pontu importante sira hosi partidu sira no koligasaun sira, antes dokumentu ne'e hetan aprovasaun hamutuk ho Komisaun Nasional Eleisaun nian (CNE).

Boletin sira votu nian hahú imprimi, karik, iha loron-kuarta iha Gráfika Nasional, iha prosesu ida ne'ebé sei dura durante semana hirak nia laran.

"Lei defini katak tenki imprimi iha total hosi boletin sira ne'ebé ekivale ho númeru eleitor sira liu 10%. Ka, ho informasaun atual sira ba eleitor rihun 790 resin, ami tenki imprimi boletin votu hamutuk rihun 870 resin", Acilino Manuel Branco esklarese.

Resenseamentu taka ona no agora hala'o verifikasaun hosi lista sira - ne'ebé sei koriji iha oras 48 nia laran - antes komunika informasaun sira ba CNE ne'ebé sei publika to'o final semana ne'e hamutuk ho informasaun kona-ba sentru sira no fatin sira votasaun nian.

Preokupasaun ida hosi autoridade eleitoral sira maka asesu ba fatin balun votasaun nian, liuliu iha zona sira ne'ebé susar atu to'o ka asesu sira hetan estraga tanba tempu ne'ebé ladi'ak.

Responsável hosi STAE hatete katak tékniku sira iha fatin komprova ona situasaun sira kona-ba problema sira ne'ebé previstu, hanesan ezemplu funsionáriu sira ne'ebé bele ajuda lori material nesesáriu sira ba votasaun.

"Informasaun kona-ba problema sira hato'o ona ba ministériu sira ne'ebé relevante no halo ona intervensaun balun iha fatin sira ne'e no, tanba ne'e, ami konsege garanti katak sei rezolve eventual problema sira iha sentru sira votasaun nian", nia hatutan.

Maibé, "tanba labele fó garantia 100%", iha medida sira kontinjénsia nian, inklui selu ema sira ne'ebé ajuda lori material, hatete hosi sekretáriu-jeral.

Tinan ne'e, votu sei ladún iha observador internasional sira duké iha tinan 2017, liuliu tanba organizmu internasional sira, inklui Uniaun Europeia (UE) la fó orsamentu ba prosesu eleitoral ne'e.

"Maski nune'e, ami husu ona observador internasional sira ho nasional sira. Jornalista sira mós hahú husu akreditasaun. Lusa hanesan órgaun informasaun internasional maka husu ba dala uluk. Ami hein katak sira seluk mós sei husu", nia refere.

Iha lejislativu tinan 2017, eleitor hamutuk 764.858 iha estasaun votu disponível hamutuk 1.121 iha sentru votasaun hamutuk 859.

Kampaña ba eleisaun loron 12 Maiu, ne'ebé konkore partidu ho koligasaun sira hamutuk ualu, hahú iha loron-tersa no hala'o to'o 09 Maiu.

ho Lusa

 


Comentários

Critério de publicação de comentários