Pájina aktualizada iha 22:07h, sabado 21 Abril

Timor-Leste/Eleisaun: Partidu ho koligasaun sira namkari iha nasaun lara hodi hahú kampaña

09 de Abril de 2018, 20:14

Partidu haat no koligasaun tolu hosi koligasaun haat ne'ebé konkore ba eleisaun lejislativu antesipadu iha Timor-Leste hahú, iha loron-tersa ne'e, sira nia kampaña ho eventu sira ho dimensaun boot no ki'ik iha kuaze teritóriu tomak, haktuir hosi kalendáriu ofisial.


Iha forsa polítika rua de'it, Aliansa Mudansa ba Progresu (AMP) - koligasaun ne'ebé halibur forsa tolu ne'ebé agora daudaun iha opozisaun (CNRT, PLP ho KHUNTO) - ho Frente Revolucionária do Timor-Leste Independente (Fretilin) - ne'ebé lidera koligasaun iha Governu - maka iha previzaun ba komísiu sira.

AMP - koligasaun ne'ebé lidera hosi Xanana Gusmão ho Taur Matan Ruak -, kampaña sei hahú iha kampu futebol Ainaro nian, iha kilómetru 131 hosi súl Díli nian, no Fretilin - lidera hosi atual primeiru-ministru Mari Alkatiri - hili vila Manatuto, iha kilómetru 68 hosi Díli.

Partidu Demokrátiku (PD), parseiru Fretilin nian iha Governu, hahú nia kampaña iha Rejiaun Administrativu Espesial Oecusse-Ambeno, ne'ebé sei hahú iha loron rua dahuluk kampaña nian.

Iha Díli, kapital nasaun nian, sei iha forsa kandidatu rua, Partidu Republikanu (PR) ne'ebé lansa nia kampaña iha sede partidu nian, ho koligasaun Movimentu Dezenvolvimentu Nasional (MDN) ne'ebé sei fahe asaun iha estrada iha munisípiu lima.

Movimentu Sosial Demokrata (MSD) sei halo kampaña iha vila Liquiçá, iha oeste kapital nian no koligasaun hosi Frente Dezenvolvimentu Demokrátiku (FDD) sei halo iha Lautém.

Ikusmai, Partidu Esperansa Pátria (PEP) sei hahú nia kampaña ofisial iha loron-kuarta, ho asaun ida iha Bobonaro, kapital hosi munisípiu Maliana, iha kilómetru 120 hosi sudueste kapital nian.

Asaun sira sei hahú kampaña naruk ne'ebé sei halo durante fulan ida, to'o 09 Maiu, antes hahú loron rua reflesaun nian no votasaun. Loron reflesaun sira nian, iha Timor-Leste, hanesan mós oportunidade ida ba eleitor sira hodi fila ba sira nia fatin resenseamentu no ne'ebé tenki vota no, tanba kondisaun hosi estrada sira, bele halo viajen kleur.

Hafoin kampaña boot ida iha lejislativu 2017 nian, ho partidu prinsipal sira gasta dolar millaun resin, kampaña agora nian sei ladún boot, haktuir hosi fonte sira hosi forsa polítika prinsipal sira.

Tuir tradisaun, kampaña aposta iha komísiu sira iha kapital sira munisípiu sira nian no hafoin ne'e asaun ki'ik sira iha dalan sira, no zona Tasi Tolu, iha zona oeste kapital nian, serve nafatin hanesan "régua" hodi sukat forsa kampaña nian.

AMP nian komísiu ikus halo iha loron 08 Maiu, iha Tasi Tolu - iha loron ikus koligasaun sei ba Ataúro -, no Fretilin nia komísiu ikus sei halo iha fatin hanesan iha loron ikus kampaña nian, 09 Maiu.

Iha nível global, iha orevizaun ba komísiu hamutuk 37 iha nasaun tomak.

Ema timoroan sira sei hili deputadu na'in 65 hosi lejislatura dalima Parlamentu Nasional nian.

Previzaun maka Sekretáriu Tékniku hosi Administrasaun Eleitoral sei fó sai númeru ho fatin hosi sentru sira votasaun nian no estasaun sira votu nian to'o loron-kinta ne'e.

Kalendáriu defini katak apuramentu munisipal ho rejional hosi votu sira halo to'o loron 14 Maiu, ho apuramentu ikus hosi rezultadu sira - ne'ebé klarifika votu disputadu sira - halo to'o loron 17 tuirmai.

Komisaun Nasional Eleisaun nian iha, hafoin ne'e, loron tolu hodi elabora rezultadu hosi apuramentu rezultadu nasional provizóriu sira, loke to'o loron 22 Maiu períudu ida ba eventual rekursu hosi rezultadu sira.

Tribunal Rekursu hafoin ne'e sei analiza eventual rekursu sira ne'ebé válidu no sei fó sai rezultadu sira to'o loron 27 Maiu.

ho Lusa

 


Comentários

Critério de publicação de comentários