Pájina aktualizada iha 03:14h, tersa-feira 12 Dezembru

Komité parlamentar australianu loke períudu submisaun nian kona-ba tratadu fronteira ho Timor

10 de Abril de 2018, 22:42

Komité hosi Tratadu sira parlamentu australianu nian hahú ona períudu submisaun públiku sira hosi sidadaun ka organizasaun sira kona-ba akordu foun hosi fronteira tasi nian ho Timor-Leste, iha ámbitu hosi prosesu ratifikasaun dokumentu nian.


Prosesu ratifikasaun hosi parlamentu hanesan importante hodi hala'o tratadu istóriku ne'ebé maka governu rua asina iha loron 06 Marsu iha Nova Iorke no ne'ebé defini ho forma permanente fronteira tasi entre Timor-Leste ho Austrália.

Lejislasaun australianu kalkula prazu anterior ida ba prosesu ratifikasaun nian, ne'ebé iha kazu ne'e hotu iha loron 20 Abril, ba submisaun públiku sira kona-ba dokumentu, ne'ebé entrega ona ba parlamentu hosi ministra Negósiu Estranjeiru australianu, Julie Bishop, iha fulan-Marsu nia rohan.

Vontade hosi governu australianu maka atu parlamentu bele vota tratadu "iha tinan ne'e nia laran", haktuir Bishop, no hahú ona prosesu preparasaun "hosi lejislasaun implementasaun nian" no serbisu ho Timor-Leste no ho empreza sira ne'ebé halo operasaun iha Tasi Timor hodi finaliza prosesu tranzitóriu relasionadu ho mudansa sira ne'ebé maka hato'o iha dokumentu.

Iha konkretu, hanesan ezemplu, tratadu implika atu Timor-Leste simu 100% - agora simu 90% no Austrália simu 10% - hosi reseita sira ne'ebé hetan hosi posu ativu sira iha rejiaun, liuliu Bayu Undan.

Iha momentu ne'ebé aprezenta tratadu iha parlamentu, Bishop hatete katak Austrália iha empeñu atu futuru Timor-Leste nian sai "estável no prósperu", nune'e apoia nia aspirasaun sira hodi "hetan nia potensial ekonómiku".

Julie Bishop refere iha konkretu ba kestaun boot ne'ebé maka seidauk rezolve, liuliu dezenvolvimentu hosi kampu petrolíferu Greater Sunrise nian, ne'ebé seidauk iha akordu ida.

"Ami rekoñese katak dezenvolvimentu [hosi Greater Sunrise] sei lori benefísiu importante sira, liuliu ba Timor-Leste. Ami senti ansiozu hodi kolabora ho Timor-Leste, bainhira serbisu ho empreza sira hosi joint venture hodi hetan dalan komersial ida di'ak hodi dezenvolve Greater Sunrise", governante ne'e hatete.

Ba ministra, "tratadu hanesan konkista istóriku ida ba Austrália ho Timor-Leste".

"Ami rezolve problema naruk ida, ami estabelese limiti tasi permanente sira ho lansa ona baze sira ba kapítulu foun ida iha ami nia relasionamentu ho nasaun viziñu ida ne'ebé besik tebes", Julie Bishop esplika iha nia deklarasaun ba parlamentu.

Tuir xefe diplomasia australianu nian, "hanesan ezemplu ida ho valor no importánsia hosi direitu internasional hodi rezolve problema sira no diverjénsia sira entre estadu sira liuhosi negosiasaun pasífiku sira".

"Hanesan ami hatete ona iha dokumentu hosi Austrália nian kona-ba Polítika Externa, ne'ebé divulga iha tinan liubá, katak Austrália fiar atu orden internasional ho baze iha regra sira hanesan fundamental ba ita nia seguransa no prosperidade koletivu sira", nia hatutan mós.

Bishop destaka "vontade di'ak no kompromisu hosi nasaun rua durante negosiasaun sira", felisita mós "knaar importante" hosi komisaun konsiliasaun independente ne'ebé halo negosiasaun sira hetan tratadu ida.

Prosesu ratifikasaun hosi tratadu hosi parte Parlamentu Nasional Timor-Leste nian karik sei akontese de'it hafoin tomada pose ba deputadu sira ne'ebé sei eleitu iha eleisaun loron 12 Maiu oinmai.

ho Lusa

 


Comentários

Critério de publicação de comentários