Pájina aktualizada iha 22:01h, sabado 21 Abril

Governu timoroan ho BNU asina akordu hodi automatiza pagamentu impostu alfándega nian

12 de Abril de 2018, 23:20

Iha loron-kinta ne'e, Governu asina ona akordu koperasaun ida ho BNU, filial hosi CGD iha Timor-Leste, hodi halo automatizasaun ba pagamentu impostu sira alfándega nian, hanesan dalan hodi hamenus fraude no fasilita importador ho esportador sira nia moris.


Akordu haree ba instalasaun hosi terminal pagamentu automátiku iha postu alfándega tomak, iha prosesu ida ne'ebé sei hahú iha tempu badak iha serbisu sentral sira no iha Aeroportu Nicolau Lobato, iha Díli, no sei aumenta depois ba postu fronteira sira iha Batugadé, Suai ho enklave Oecusse-Ambeno.

Aleinde hamenus posibilidade ba fraude, sistema foun hamenus kustu no demora ba ajente ekonómiku sira, hodi evita halo pagamentu iha banku (iha presu sira seluk ne'ebé tenki selu).

Kontribui mós ba esforsu sira hosi Governu timoroan hodi hamenus dependénsia iha osan hodi sirkula iha nasaun. Timor-Leste uza dólar amerikanu hanesan osan ofisial nune'e nota norte-amerikanu sira tenki importa fizikamente ba nasaun laran, implika folin ne'ebé aas tebes tanba seguransa ne'ebé maka tenki presiza.

José Fátima Abílio, diretor-jeral hosi Autoridade Aduaneiru, esplika ona ba Lusa katak medida hanesan hakat importante ida hodi moderniza sistema fiskal tomak timoroan nian.

Hanesan importante tebes iha kuadru hosi reforma Alfándega nian ne'ebé maka ami hala'o daudaun. Agora daudaun iha fatin barak ne'ebé ami halo kobransa laiha sistema sira hodi halo pagamentu eletróniku diretu", nia esplika.

"Ne'e sei fasilita tebes kobransa, promove transparénsia hosi prosesu, evita fraude no fasilita komérsiu. Sé maka ba selu, lalika ba banku. Ne'e hanesan di'ak tebes", nia hatutan.

Iha tinan liubá, Estadu timoroan foti ona reseita aduaneiru sira ho folin besik dolar millaun 75, folin ne'ebé hanesan ho tinan 2016, esplika hosi responsável aduaneiru ne'e.

Carolina Letra, diretora-jeral adjuntu hosi BNU iha Timor-Leste, hatete ba Lusa katak medida ne'e hanesan hakat dahuluk iha prosesu pagamentu eletróniku hosi impostu sira ne'ebé to'o agora halo iha totalidade iha numeráriu.

"Hanesan determinasaun jeral ida hosi nasaun hodi hamenus sirkulasaun hosi osan no ajuda kombate mós brankeamentu kapital sira. Ne'e hanesan hakat importante tebes no ami hein katak hanesan hakat dahuluk sira hosi ideia oioin hodi halo pagamentu ba impostu sira ho dalan automátiku", nia hatete.

"BNU senti satisfeitu tebes tanba kolabora iha inisiativa pioneiru ne'ebé sei muda maka'as dalan oinsá serbisu ho Estadu no oinsá prosesu pagamentu hosi impostu sira", nia refere.

Ba Fernanda Borges, responsável hosi prosesu reforma fiskal nian, pagamentu eletróniku iha alfándega sira "sei ajuda aumenta kapasidade hosi autoridade aduaneiru sira hodi hetan tan reseita sira, proporsiona seguransa ba importador sira no ba públiku katak reseita sei ba Estadu".

Sei hala'o nafatin kontaktu sira entre Ministériu Finansa ho Banku Sentral hodi aumenta neineik dalan sira ba pagamentu eletróniku nian, hodi envolve entidade bankáriu sira seluk.

ho Lusa

 


Comentários

Critério de publicação de comentários