Pájina aktualizada iha 12:52h, sabado 22 Setembru

AI: Médiu Oriente ho Norte Áfrika hanesan responsável ba 90% hosi ezekusaun ba kastigu mate nian

13 de Abril de 2018, 00:32

Rejiaun Médiu Oriente ho Norte Áfrika nian hanesan responsável hosi 90% resin hosi kazu sira ezekusaun ba kastigu mate nian iha mundu, hatete hosi relatóriu kona-ba tema ne'ebé elabora hosi Amnistia Internasional (AI) iha loron-kinta ne'e.


Iha relatóriu, ho informasaun sira relasionadu ho 2017, AI refere katak hosi ezekusaun hamutuk 933 ne'ebé maka bele konfirma, ezekusaun hamutuk 847 rejista iha rejiaun rua (kontra ezekusaun hamutuk 856 iha tinan 2016), ho Iraun (ema na'in 507), Arábia Saudita (na'in 146) no Irake soma 92% hosi total.

Tuir AI, iha tinan hanesan, no iha rejiaun rua, ezekusaun hamutuk 264 hosi kastigu ne'e iha relasaun ho krimi tráfiku droga nian, no dekreta mós sentensa hamutuk 619 ba kastigu mate nian (menus duke 764 iha tinan 2016), ho Ejiptu lidera total ida hamutuk 402.

Hosi ezekusaun hamutuk 933 iha nasaun hamutuk 23, menus hosi 4% duké iha tinan 2016 (ezekusaun hamutuk 1.032) no menus hosi 39% duké iha tinan 2015 (1.634), AI hasai hosi lista númeru hosi kastigu sira ne'ebé halo iha Xina tanba asuntu ne'e iha Xina konsidera hanesan segredu Estadu nian.

No, tanba ne'e, maka AI refere katak, iha análize rejional ida - rejiaun sira ne'ebé defini ho kritériu sira hosi AI -, análize hosi Ázia/Pasífiku maka instituisaun hanoin hanesan fatin ne'ebé akontese maka'as ezekusaun sira - "la hatene loloos extensaun loloos hosi asaun sira maski AI fiar katak akontese rihun resin".

Iha relatóriu, AI destaka katak konfirma ona kazu ezekusaun hamutuk 93 iha nasaun sia (hamutuk 130 iha Estadu hamutuk 11 iha tinan 2016) ho Pakistaun, Sri Langka, Singapura, Bangladexe, Índia, Indonézia ho Tailándia hanesan nasaun balun ne'ebé maka aplika kastigu mate nian, barak liu tanba tráfiku droga nian.

Kona-ba númeru hosi sentensa sira kastigu mate nian, AI konfirma ona kazu foun hamutuk 1.037 iha nasaun hamutuk 18, koresponde ba diminuisaun ki'ik ida relasionadu ho tinan 2016 - Bangladexe (kastigu foun hamutuk 273), Sri Langka (218) hanesan Estadu sira ho númeru boot.

Iha Amérika, Estadus Unidus hanesan ba dala sia konsekutivu, nasaun úniku ne'ebé maka hala'o ezekusaun, AI konfirma ezekusaun hamutuk 23 no sentensa ba kastigu mate nian to'o 41.

Aleinde Estadus Unidus, iha de'it Estadu rua seluk maka aplika sentensa kastigu mate nian iha kontinente amerikanu - Guiana ho Trinida & Tobago. Iha sentidu seluk, Guatemala sai hanesan nasaun ba dala 142 ne'ebé maka halakon kastigu mate iha lei no iha prátika.

Iha Áfrika subsarianu iha de'it nasaun rua maka aplika kastigu mate nian - Somália (kazu hamutuk 24) no Sudaun-Súl (hamutuk haat) -, kontra kazu lima ne'ebé halo iha tinan 2016, faktu ida ne'ebé AI destaka hanesan "hakat pozitivu sira" ne'ebé bele iha "impaktu importante ida" hodi hamenus sentensa sira iha mundu tomak.

Númeru hosi sentensa sira diminui ona hosi 1.086 iha tinan 2016 ba 878 iha tinan 2017, ho Nijéria kaer maioria hosi desizaun judisial sira. AI hatutan katak, iha parte pozitivu, Guiné Konakri halakon ona kastigu mate nian ba krimi tomak no Burkina Faso, Xade, Gámbia ho Kénia "fó hakat importante sira" iha sentidu hanesan.

"Avansu sira rejista iha Áfrika Subsarianu reforsa ona nia pozisaun hanesan "farol esperansa" ida hodi halakon. Lideransa hosi nasaun sira iha rejiaun ne'e fó esperansa foun ida hodi halakon kastigu aat, dezumanu no degradante", hatete hosi sekretáriu-jeral AI nian, Salil Shetty, hodi fó hanoin katak iha Estadu abolisionista hamutuk 20 iha sub-rejiaun.

Iha Europa ho Ázia Sentral, Bielorúsia hanesan nasaun úniku ne'ebé halo sentensa kastigu mate nian, ho ezekusaun rua, no dekreta ona sentensa haat seluk ne'ebé hein hela iha "dalan ba mate nian".

Iha Kazakistaun iha de'it ema na'in ida ne'ebé maka kondena ba mate ne'ebé hein hela iha kadeia.

Kazakistaun, Federasaun Rusu ho Tajikistaun kontinua observa adiamentu ida kona-ba ezekusaun sira.

Iha universu hosi Estadu sira ne'ebé halo parte iha Komunidade Nasaun sira Lian Portugeza nian (CPLP) - Angola, Brazil, Cabo Verde, Guiné-Bissau, Mosambike, Portugal, São Tomé & Prínsipe ho Timor-Leste halakon ona kastigu mate nian ba krimi tomak -, Guiné Ekuatorial de'it maka mantén kastigu mate nian iha lei.

ho Lusa

 


Comentários

Critério de publicação de comentários