Pájina aktualizada iha 03:16h, tersa-feira 12 Dezembru

Nijéria: Unicef akuza Boko Haram naok labarik rihun resin dezde tinan 2013

14 de Abril de 2018, 00:37

Labarik rihun resin maka grupu radikal islámiku Boko Haram naok iha noroeste Nijéria nian dezde tinan 2013, inklui labarik-feto na'in 276 ne'ebé naok iha eskola Chibok nian iha tinan 2014, hatete hosi Fundu ONU nian ba Infánsia (Unicef) iha loron-sesta ne'e.


Liuhosi komunikadu ida, ajénsia ONU indika katak iha "tinan 2019 sei halo tinan haat" hodi hanoin sekuestru hosi labarik-feto sira hosi Chibok, iha noroeste nasaun nian, no ne'ebé "na'in atus resin seidauk fila ba sira nia uma".

"Tinan haat hanoin loron naok iha Chibok halo ita hanoin hikas katak labarik sira iha noroeste Nijéria nian kontinua hetan atake iha eskala boot", hatete hosi reprezentante Unicef nian iha Nijéria, Mohamed Maick Fall.

Atake hasoru eskola ida iha fatin ida iha Dapchi, iha fulan-Fevereiru liubá, konsege naon labarik-feto na'in 110, no na'in lima ema oho, maski barak liu hetan liberdade liutiha fulan ida.

"Labele admiti atake sira ne'ebé akontese beibeik hasoru labarik sira ne'ebé iha eskola sira. Labarik sira iha direitu ba edukasaun no hetan protesaun. Fatin sira estudu nian tenki hanesan seguru", Fall hatutan.

Tuir Unicef, dezde hahú konflitu ne'ebé hahú hosi grupu Boko Haram, iha kuaze tinan sia liubá iha noroeste nasaun nian, pelumenus profesór na'in 2.295 maka ema oho no eskola hamutuk 1.400 resin hetan estraga, no maioria hosi instalasaun sira la loke fila fali.

Boko Haram, ne'ebé iha lian lokal signifika "edukasaun la'ós islámiku hanesan pekadu", luta tanba hakarak hala'o Estadu islámiku ida iha Nijéria, nasaun ne'ebé maioria musulmanu iha zona norte no iha ema kristaun barak iha rejiaun sira súl nian.

Hahú tinan 2009 maka grupu radikal islámiku halo ona ema millaun resin mate no ema millaun rua resin maka sai hanesan deslokadu internu.

ho Lusa

 


Comentários

Critério de publicação de comentários