Pájina aktualizada iha 12:32h, sabado 22 Setembru

Timor-Leste/Eleisaun: Observador sira destaka hakmatek iha kampaña kompetitivu

16 de Abril de 2018, 21:33

Kampaña ba eleisaun lejislativu antesipadu iha loron 12 Maiu iha Timor-Leste hala'o ho hakmatek ho forsa polítika sira aposta iha komísiu sira ne'ebé destaka "kuríkulu revolusionáriu" hosi líder sira, haktuir hosi observador sira hosi organizmu norte-amerikanu ida.


Ne'e hanesan konkluzaun ida hosi ekipa observador sira hosi International Republican Institute no hosi USAid ne'ebé iha Timor-Leste hodi akompaña eleisaun lejislativu sira no ne'ebé marka prezensa iha nasaun hodi akompaña asaun balun hosi kampaña.

IRI hanesan instituisaun internasional balun ho observador sira durante kampaña tomak, ho instituisaun sira seluk limitadu tanba votasaun ne'e la previstu no nune'e maka laiha orsamentu.

Hanesan ezemplu maka Uniaun Europeia ne'ebé iha eleisaun tinan liubá iha ekipa observador boot ida maibé tinan ne'e sei reprezenta de'it hosi elementu na'in rua.

Iha análize bahosi semana dahuluk, ne'ebé maka Lusa hetan asesu, ekipa IRI nian, refere katak ambiente hosi loron dahuluk sira kampaña nian hanesan "hakmatek no ordem" ho "kompetitividade maka'as" entre forsa polítika sira.

Observador sira haree katak komísiu sira hanesan métodu prinsipal kampaña nian, tau hamutuk ho enkontru komunitáriu sira ho dimensaun ki'ik no asaun sira ne'ebé hala'o entre uma sira iha fatin oioin iha nasaun.

"Partidu sira nia mensajen destaka sira nia kredensial revolusionáriu sira hosi períudu okupasaun [indonéziu nian] maski, kompara ho eleisaun anterior sira, foka liu iha polítika públika sira no plataforma sira", refere hosi observador sira.

Autoridade eleitoral prinsipal sira, Komisaun Nasional Eleisaun nian (CNE) ho Sekretariadu Tékniku hosi Administrasaun Eleitoral (STAE), hanesan "vijilante" no hetan benefísiu hosi esperiénsia sira hosi nia funsionáriu sira, manán iha eleisaun tinan liubá.

Forsa sira seguransa nian hatudu "konfiante katak ambiente kampaña nian sei kontinua pasífiku ho seguru", refere mós hosi observador sira.

Ne'e hanesan prosesu eleitoral dahaat iha Timor-Leste iha fulan 18 nia laran, hafoin eleisaun lokal sira iha tinan 2016 nia rohan, eleisaun prezidensial sira iha fulan-Marsu 2018 ho lejislativu sira iha fulan-Juñu tinan liubá.

Análize hosi observador sira halo ho baze iha partisipasaun hosi eventu partidáriu sia, enkontru ualu ho responsável polítiku sira, 14 ho responsável eleitoral sira, hitu ho forsa sira seguransa nian no haat ho sosiedade sivil.

Eleisaun sira konvoka ona hosi Prezidente Repúblika, Francisco Guterres Lu-lo, ne'ebé desidi sobu parlamentu hodi desblokeia difikuldade polítika ne'ebé maka nasaun hasoru, hafoin programa ho Orsamentu retifikativu hosi Governu minoritáriu la liu iha parlamentu.

Partidu haat ho koligasaun haat - númeru ki'ik tebes iha istória - kandidata ona ba eleisaun sira ne'ebé sei partisipa hosi númeru eleitor boot tebes: besik rihun 787, liu rihun 23 iha tinan 2017.

Kampaña, ne'ebé hahú iha loron 10 Abril, sei hala'o to'o loron 09 Maiu antes loron rua reflesaun no antes votasaun ne'ebé sei halo iha loron 12 Maiu entre tuku 07:00 to'o 15:00.

Iha nível nasional, sei instala estasaun sira votu nian iha total hamutuk 1.151, fahe ba sentru votasaun hamutuk 876, ne'ebé sei tau hamutuk ho estasaun sira iha estranjeiru, iha Austrália, Koreia-Súl, Portugal ho Reinu Unidu.

Hosi votu, sei hili deputadu na'in 65 ba lejislatura dalima Timor-Leste nian, nasaun ne'ebé restaura nia independénsia iha loron 20 Maiu 2002 no ne'ebé, hahú hosi momentu ne'ebá, iha ona governu hitu.

ho Lusa

 


Comentários

Critério de publicação de comentários