Pájina aktualizada iha 03:18h, tersa-feira 12 Dezembru

Atake iha loron-sábadu sei hamenus posibilidade ba atake kímiku foun iha Síria

16 de Abril de 2018, 22:24

Sekretáriu-jeral NATO nian, Jens Stoltenberg, hatete iha loron-segunda ne'e katak atake sira ne'ebé halo iha loron-sábadu hosi Estadus Unidus, Reinu Unidu ho Fransa hasoru alvu sira iha Síria sei hamenus kapasidade hosi Governu Bashar al-Assad nian hodi halo fali atake kímiku foun sira.


Iha entrevista ida ba televizaun turku NTV, Stoltenberg afirma mós katak atake hamutuk hanesan "mensajen klaru" ida ba Assad, Rúsia ho Iraun (nia aliadu sira) katak labele aseita utilizasaun hosi arma kímiku sira no aliadu sira labele "hakmatek".

Washington, Paris ho Londres hala'o ona iha loron-sábadu madrugada atake tolu, ho misil atus resin, hasoru alvu sira ne'ebé iha ligasaun ba produsaun hosi armamentu kímiku iha Síria, hodi hatán ba atake ida ne'ebé deskonfia halo ho arma kímiku sira iha sidade Douma, Ghouta Oriental, hosi parte Governu Bashar al-Assad nian.

Responsável hosi Aliansa Atlántiku, ne'ebé iha hela Turkia hodi halo kontaktu sira, no hasoru malu ho Prezidente Recep Tayyip Erdogan, felisita ona "apoiu ne'ebé maka Turkia fó ba operasaun ne'e".

Tuir komunikasaun ofisial sira, Stoltenberg nia vizita halo parte iha preparativu sira ba simeira NATO nian iha Bruxelas iha fulan-Jullu.

ho Lusa

 


Comentários

Critério de publicação de comentários