Pájina aktualizada iha 10:28h, segunda-feira 22 Outubru

Timor-Leste/Eleisaun: Líder hosi Fretilin hatete ba apoiante sira katak partidu sei investiga rezultadu

14 de Maio de 2018, 21:58

Sekretáriu-jeral Fretilin, Mari Alkatiri, husu ona kalma, iha loron-domingu ne'e, ba militante sira hosi nia partidu bainhira diresaun investiga suspeitu sira hosi alegadu iregularidade hosi lejislativu loron-sábadu nian, ne'ebé maka opozisaun hetan maioria absoluta.


"Ha'u la konvensidu ho rezultadu ne'e. Ami sei investiga suspeitu sira ne'ebé ami iha ba iregularidade sira. Ne'e la signifika prova sira. Maibé ami deskonfia", nia afirma iha deklarasaun ida liuhosi vídeo ida ne'ebé maka publika iha pájina ofisial Fretilin nian iha Facebook.

Iha deklarasaun ida ho lian tétun ba militante sira partidu nian ne'ebé halibur hamutuk iha Komité Sentral Fretilin nian (CCF), Mari Alkatiri hatete katak bainhira la komprova deskonfiansa sira ne'e, Fretilin sei aseita rezultadu no sei hanesan "opozisaun forte" ida.

"Ha'u husu ba kamarada sira iha Timor-Leste tomak hodi mantén kalma bainhira diresaun Fretilin nian investiga", nia hatete.

Lusa husu ona reasaun ida hosi líder Fretilin nian kona-ba rezultadu eleitoral sira, no fonte ida hosi partidu esplika katak ikusmai sei deklarasaun ida. Akontese mós ho diresaun hosi koligasaun opozisaun nian, AMP, ne'ebé hatete katak deklarasaun ba jornalista sira sei halo iha loron-segunda.

Iha vídeo ba nia apoiante sira, Alkatiri felisita tanba iha plateia - hosi militante atus resin partidu nian - iha "joven barak", sinal ida katak "luta sei kontinua" no katak bainhira la manán agora partidu sei manán iha futuru.

"Mantén kalma bainhira lideransa serbisu, tanba atu halo reklamasaun presiza informasaun sira, presiza faktu sira", nia repete.

"Fretilin sei aprezenta reklamasaun ida hodi komprova katak iha faktu sira hodi aprezenta reklamasaun sira. Bainhira laiha faktu sira, ita tenki iha pasiénsia ho aseita. Ita sei sai hanesan opozisaun forte ida. No nunka dezisti. Ita sei la sai hanesan eskada ida hodi ajuda sira seluk bainhira iha problema sira", nia afirma.

Aliansa Mudansa ba Progresu (AMP) manán ona eleisaun lejislativu antesipadu sira iha loron-sábadu iha Timor-Leste ho votu liu rihun 308, ka 49,56% hosi total, haktuir hosi informasaun ne'ebé hanesan ikus hosi Sekretariadu Tékniku Administrasaun Eleitoral (STAE) nian.

Informasaun sira refere ba kontajen votu hosi 99,66%, falta de'it tolu hosi sentru sira votasaun hamutuk 85 hosi munisípiu Bobonaro nian ne'ebé maka AMP lidera ho vantajen boot (liu 51,29% hosi votu sira).

Ho apoiu eleitoral ne'e, AMP, lidera hosi eis-Prezidente sira Xanana Gusmão ho Taur Matan Ruak, hetan kadeira hamutuk 34 hosi kadeira hamutuk 65 iha Parlamentu Nasional, ne'ebé permiti harii Governu konstitusional daualuk no la presiza ho apoiu adisional ruma.

Iha fatin daruak maka Frente Revolucionária do Timor-Leste Independente (Fretilin), ne'ebé lidera ona koligasaun minoritáriu hosi Governu anterior, no hetan besik votu rihun 213, ka 34,18% hosi total, mantén númeru deputadu hanesan, na'in 23.

Iha Parlamentu sei iha mós Partidu Demokrátiku (PD) - parseiru Fretilin nian iha Governu dahitu, ne'ebé lakon deputadu na'in rua, hetan de'it deputadu na'in lima no votu besik rihun 50 ka 7,95% hosi total.

Frente Dezenvolvimentu Demokrátiku (FDD) - koligasaun ida hosi partidu ki'ik haat - tama ba dala uluk iha parlamentu no sei hetan fatin tolu no hetan ona votu besik rihun 34 ka 5,5% hosi total.

ho Lusa

 


Comentários

Critério de publicação de comentários