Pájina aktualizada iha 01:48h, sesta-feira 26 Maiu

Ramos-Horta felisita AMP ba vitória, husu atu "kuida povu"

14 de Maio de 2018, 23:01

Eis-Prezidente timoroan José Ramos-Horta felisita ona, iha loron-domingu, Aliansa Mudansa ba Progresu (AMP) tanba vitória ho maioria absoluta iha eleisaun lejislativu antesipadu iha loron-sábadu, hodi apela ba sira nia polítika "hodi kuida povu".


"Ha'u hakarak felisita ba sé mana manán no apela de'it atu kuida povu, no hatudu sentidu ida Estadu nian no dialoga ho Fretilin no mós ho partidu sira seluk, hodi hametin dame no estabilidade iha nasaun ne'e", dirijente istóriku timoroan hatete ba Lusa.

Ramos-Horta, ne'ebé halo kampãna ho Frente Revolucionária do Timor-Leste Independente (Fretilin), konsidera ona importante atu AMP halo "asaun di'ak ne'ebé maka bele hodi hadi'a governasaun no hadi'a povu nia moris".

Nia hatete katak hosi parte Fretilin nian, partidu daruak ne'ebé hetan liu votu (kontrola fatin 23 hosi fatin 65 iha Parlamentu Nasional), sei sai hanesan "opozisaun forte" ida.

Iha deklarasaun sira ba Lusa, José Ramos-Horta - ne'ebé tinan ne'e hatais ona, liutiha dékada barak nia laran, kamizola hosi partidu ne'ebé nia harii - lakohi analiza ho detalle ba rezultadu no komenta aspetu konkretu liu, hanesan lakon boot Fretilin nian iha enklave Oecusse-Ambeno.

Maski rekoñese katak AMP la presiza ema ida hodi governa, Ramos-Horta hatete katak hanesan "importante" atu "líder boot na'in tolu nasaun nian" - Xanana Gusmão ho Taur Matan Ruak hosi AMP, ho Mari Alkatiri hosi Fretilin - "tuur ho ko'alia".

"La'ós atu tuur iha Governu maibé tenki hetan dalan ida hodi hametin dame no hadi'a governasaun", nia konsidera.

AMP manán ona manán ona eleisaun lejislativu antesipadu sira iha loron-sábadu iha Timor-Leste ho votu liu rihun 308, ka 49,56% hosi total, haktuir hosi informasaun ne'ebé hanesan ikus hosi Sekretariadu Tékniku Administrasaun Eleitoral (STAE) nian.

Informasaun sira refere ba kontajen votu hosi 99,66%, falta de'it tolu hosi sentru sira votasaun hamutuk 85 hosi munisípiu Bobonaro nian ne'ebé maka AMP lidera ho vantajen boot (liu 51,29% hosi votu sira).

Ho apoiu eleitoral ne'e, AMP, lidera hosi eis-Prezidente sira Xanana Gusmão ho Taur Matan Ruak, hetan kadeira hamutuk 34 hosi kadeira hamutuk 65 iha Parlamentu Nasional, ne'ebé permiti harii Governu konstitusional daualuk no la presiza ho apoiu adisional ruma.

Iha fatin daruak maka Frente Revolucionária do Timor-Leste Independente (Fretilin), ne'ebé lidera ona koligasaun minoritáriu hosi Governu anterior, no hetan besik votu rihun 213, ka 34,18% hosi total, mantén númeru deputadu hanesan, na'in 23.

Iha Parlamentu sei iha mós Partidu Demokrátiku (PD) - parseiru Fretilin nian iha Governu dahitu, ne'ebé lakon deputadu na'in rua, hetan de'it deputadu na'in lima no votu besik rihun 50 ka 7,95% hosi total.

ho Lusa

 


Comentários

Critério de publicação de comentários