Pájina aktualizada iha 11:18h, segunda-feira 22 Outubru

Koligasaun vensedora hein katak xefe Estadu sei hanesan Prezidente "nasaun nian"

15 de Maio de 2018, 19:55

Líder hosi koligasaun AMP, ne'ebé manán ho maioria absoluta iha lejislativu iha Timor-Leste, Xanana Gusmão, hatete iha loron-tersa ne'e katak hein atu xefe Estadu sai nu'udar "Prezidente nasaun nian no la'ós hosi Fretilin" bainhira konsidera eventual rekuza polítiku sira.


"Prezidente Lu-Olo, atu rekuza, tenki aprezenta razaun rua: legal ida ho ida seluk hanesan polítika. Bainhira polítika haree ba nia partidu entaun tanba sai hanesan prezidente hosi Fretilin [Frente Revolucionária do Timor-Leste Independente], ne'ebé hanesan triste tebes, bainhira nune'e entaun ha'u sei kestiona", Xanana Gusmão hatete iha konferénsia imprensa hamutuk ida ho "númeru daruak" hosi Aliansa Mudansa ba Progresu (AMP), Taur Matan Ruak.

"Ami iha ne'e, eis-Prezidente na'in rua, no ami sei kestiona ne'e. Ba nia, ba [Francisco Guterres] Lu-Olo. Problema maka ami sei eziji ba Lu-Olo hodi sai nu'udar Prezidente nasaun nian, la'ós prezidente ida hosi Fretilin, tau iha Aitarak-Laran", nia hatete hodi refere ba Palásiu Prezidensial.

Maioria absoluta ne'ebe AMP hetan signifika katak koligasaun iha dalan fásil hodi harii governu no, hafoin ne'e, aprova Orsamentu Jeral Estadu ba tinan 2018, la presiza apoiu adisional hosi forsa polítika ruma.

Susar úniku ida maka eventual desizaun hosi Prezidente timoroan hodi rekuza Orsamentu Jeral Estadu nian ne'ebé sei halo sira tenki hetan apoiu ida hosi deputadu balun.

Iha kazu ne'e, maski AMP halo aliansa ida ho partidu rua ki'ik liu iha Parlamentu - Partidu Demokrátiku (PD, ho fatin lima) no Frente Dezenvolvimentu Demokrátiku (FDD, ho mandatu tolu) - sei hetan de'it fatin 42, menus ida duké 2/3.

Francisco Guterres Lu-Olo hanesan prezidente Fretilin nian bainhira eleitu, ho apoiu hosi nia partidu no hosi Congresso Nacional de Reconstrução Timorense (CNRT), hosi Xanana Gusmão, ne'ebé agora líder hosi AMP.

Xanana Gusmão konfirma ona katak maioria absoluta ne'ebé AMP hetan halo atu la presiza koligasaun ruma.

"Bainhira ami iha fatin 32 [maioria absoluta iha fatin 33] entaun ami tenki hanoin iha PD ho FDD. No sira sei la dukur hodi haree ba mobile sira hodi haree katak iha telefonema ruma ka la'e. Maibé hanesan ne'e entaun la'e", nia hatete.

Votu iha loron-sábadu fó ba AMP maioria absoluta ida ho fatin 34 hosi fatin 65 iha Parlamentu Nasional (liu votu rihun 305 ka 49,56% hosi total), nune'e permiti harii Governu konstitusional daualuk lahó apoio adisional.

Iha fatin daruak maka okupa hosi Fretilin, ne'ebé lidera ona koligasaun minoritáriu hosi Governu anterior, no hetan votu besik rihun 211 ka 34,27% hosi total, mantén nune'e númeru deputadu hanesan, na'in 23.

Iha Parlamentu iha mós Partidu Demokrátiku (PD), parseiru Fretilin nian iha Governu dahitu, ne'ebé lakon deputadu na'in rua hela de'it ho deputadu na'in lima no hetan ona votu kuaze rihun 49 ka 7,95% hosi total.

ho Lusa

 


Comentários

Critério de publicação de comentários