Pájina aktualizada iha 01:50h, sesta-feira 26 Maiu

Xanana Gusmão agradese maturidade povu nian

15 de Maio de 2018, 21:40

Líder hosi koligasaun ne'ebé manán iha eleisaun loron-sábadu iha Timor-Leste, Xanana Gusmão, felisita iha loron-tersa ne'e "maturidade polítika" ne'ebé ema timoroan sira hatudu durante prosesu eleitoral, ne'ebé nia konsidera justu, maski iha "falla balun".


"Ba AMP rezultadu hanesan justu. Maibé bainhira ita analiza rejistu sira no verifika, ita bele hatete ba STAE ho CNE katak iha falla balun", Xanana Gusmão hatete iha nia deklarasaun dahuluk dezde eleisaun loron-sábadu ne'ebé nia koligasuan, Aliansa Mudansa ba Progresu (AMP), manán ho maioria absoluta.

"Ami analiza hela rejistu sira hodi aprezenta reklamasaun sira, Tanba atu aprezenta reklamasaun sira presiza iha faktu sira. Bainhira povu hanesan maduru no hatudu ona maturidade polítika, líder sira hosi partidu sira tenki hatudu mós maturidade ba povu", nia afirma.

Iha konferénsia imprensa hamutuk ho líder sira seluk hosi Aliansa Mudansa ba Progresu (AMP), inklui númeru daruak, Taur Matan Ruak, líder timoroan la klarifika katak sei sai ka la'e primeiru-ministru.

Xanana Gusmão, ne'ebé lakohi halo komentáriu kona-ba formasaun Governu nian, husik ona mensajen sira ba populasaun timoroan.

"Ohin, diresaun AMP nian fó parabéns ba povu tomak, parabéns tanba sentidu responsabilidade nian ne'ebé hatudu ona, partisipa maka'as. Povu fó ona nia votu konfiansa ba AMP", nia afirma hodi konsidera katak eleisaun antesipadu halo parte hosi "prosesu susar hosi konstrusaun Estadu nian".

Xanana Gusmão agradese ona serbisu hosi fiskal sira partidu nian iha estasaun sira votu nian no hosi kuadru sira ho militante sira tanba nia serbisu durante kampaña ho jornada votasaun nian, hatudu nia "estima maka'as" tanba dedikasaun, profisionalizmu no sentidu Estadu nian hosi forsa sira seguransa nian, hosi Polísia Nasional Timor-Leste (PNTL) no hosi Forsa sira Defeza Timor-Leste nian (F-FDTL).

Husik ona nia "estima pesoal" no hosi AMP ba ofisial sira hosi Sekretariadu Tékniku ba Administrasaun Eleitoral (STAE) ne'ebé serbisu ona iha asaun eleitoral, Xanana Gusmão destaka ona forma "lalais ho profisional" hodi hasoru ho problema ki'ik sira ne'ebé mosu.

"Barak liu hanesan joven sira ne'ebé serbisu ona ho konsiénsia maka'as ba importánsia hosi prosesu ba nasaun nia futuru", nia hatete.

Maski nune'e, nia hatudu preokupasaun tanba "falla ki'ik sira" iha kontajen ho diferensa sira - iha Díli, tuir AMP, to'o ba votu rihun resin - entre númeru sira hosi kontajen hosi nia fiskal sira iha sentru sira votasaun nian no informasaun ikus hosi STAE.

Xanana Gusmão refere ona ba "maturidade polítika hosi populasaun iha jeral" ne'ebé hatene hatán ho hakmatek maski iha tensaun polítika ho "hatudu oioin hosi sidadania" durante prosesu.

"Agora hahú serbisu. Ha'u, hodi partidu tolu nia naran, asumi kompromisu katak ha'u sei serbisu ba povu, ami sei avansa ho ami nia programa polítika. No hafoin ne'e ho Orsamentu ba 2018", nia esplika.

Enkontru ho jornalista sira hetan mós prezensa hosi sekretáriu-jeral sira hosi partidu tolu ne'ebé halo parte iha AMP, Francisco Kalbuadi Lay (CNRT), Fidelis Magalhães (PLP) ho José Agostinho da Silva (KHUNTO).

Eleisaun sira iha loron-sábadu fó ba AMP maioria absoluta ida ho fatin 34 hosi fatin 65 iha Parlamentu Nasional (liu votu rihun 305 ka 49,56% hosi total), nune'e permiti harii Governu konstitusional daualuk lahó apoio adisional.

Iha fatin daruak maka okupa hosi Fretilin, ne'ebé lidera ona koligasaun minoritáriu hosi Governu anterior, no hetan votu besik rihun 211 ka 34,27% hosi total, mantén nune'e númeru deputadu hanesan, na'in 23.

Iha Parlamentu iha mós Partidu Demokrátiku (PD), parseiru Fretilin nian iha Governu dahitu, ne'ebé lakon deputadu na'in rua hela de'it ho deputadu na'in lima no hetan ona votu kuaze rihun 49 ka 7,95% hosi total.

Prosesu verifikasaun nasional kontaje nian hala'o daudaun iha Komisaun Nasional Eleisaun (CNE) nian dezde loron-tersa ne'e to'o loron-kinta antes Tribunal Rekursu sertifika informasaun sira ne'e.

ho Lusa

 


Comentários

Critério de publicação de comentários