Pájina aktualizada iha 20:41h, kuarta-feira 15 Agostu

Hahú pormenorizadu ona tabulasaun nasional hosi rezultadu sira

15 de Maio de 2018, 23:59

Prosesu pormenorizadu ba apuramentu nasional hosi rezultadu sira eleisaun lejislativu nian iha loron-sábadu liubá, iha Timor-Leste, hakat ida iha sertifikasaun hosi informasaun sira, hahú ona iha loron-tersa ne'e iha Komisaun Nasional Eleisaun (CNE) nian iha Díli.


Zona sentral ida hosi edifísiu ida hosi kompleksu CNE nian iha Díli prepara ona no taka ona hodi kria fatin ida ne'ebé, iha meza oioin, verifika ona rejistu ida-idak hosi sentru votasaun hamutuk 885 iha nasaun no hosi estranjeiru.

Iha ne'e, iha meza lima, ida rezerva ba komisáriu sira hosi CNE, ne'ebé, ho vizaun atentu hosi fiskal partidáriu sira ho observador sira, komprova katak laiha sala sira iha prosesu kontajen iha nível munisipal.

Kontajen munisipial konfirma ona katak AMP manán ona eleisaun lejislativu ho votu liu rihun 305 ka 49,56% hosi total, ne'ebé garanti fatin 34 hosi fatin 65 iha Parlamentu Nasional no posibilidade hodi harii Governu konstitusional daualuk lahó apoio adisional.

Iha fatin daruak maka okupa hosi Fretilin, ne'ebé lidera ona koligasaun minoritáriu hosi Governu anterior, no hetan votu besik rihun 211 ka 34,27% hosi total, mantén nune'e númeru deputadu hanesan, na'in 23.

Iha Parlamentu iha mós Partidu Demokrátiku (PD), parseiru Fretilin nian iha Governu dahitu, ne'ebé lakon deputadu na'in rua hela de'it ho deputadu na'in lima no hetan ona votu kuaze rihun 49 ka 7,95% hosi total.

Prezidente CNE nian, Alcino Baris, hatete ona ba Lusa katak prosesu ne'e hanesan ho tinan anterior sira no iha mekanizmu sira hodi rezolve problema ruma ne'ebé maka hetan.

"Ohin ami hahú apuramentu nasional, iha ne'e iha CNE, hahú ho prosedimentu sira hosi apuramentu no kódigu konduta nian. Ami hahú ona apuramentu hosi rejistu sira no votu reklamadu sira hosi munisípiu Aileu", nia esplika hodi refere katak apuramentu sei kontinua to'o tuku 24:00 loron-tersa ne'e, sei hahú fali iha loron-kuarta.

CNE iha prazu oras 72 nia laran, tuir lei eleitoral ne'ebé hala'o, hodi halo apuramentu ikus hosi rezultadu nasional sira, prosesu ida ne'ebé sei konklui karik iha loron-kinta. To'o agora komprova de'it rejistu sira hosi sentru votasaun sanulu.

Iha faze ne'e maka sei rezolve aspetu sira hanesan votu reklamadu ka reklamasaun sira seluk ne'ebé iha kona-ba faze anterior sira, hosi votasaun no kontajen munisipal.

Responsável CNE nian hatete katak, to'o agora, seidauk simu reklamasaun ruma tuir karta maski iha "reklamasaun verbal sira" hosi rejeisaun ka protestu ba desizaun sira kona-ba votu reklamadu balun.

"Tuir karta ami laiha kesar ida maibé saida maka ami desidi ona, ami nia desizaun hasoru votu reklamadu sira, hetan protestu no la simu hosi ema balun. Lei permiti, karik sira la aseita, durante oras 48 nia laran, hodi halo kesar ba tribunal rekursu", nia hatete.

Iha prosesu ne'e sei rezolve "diverjénsia ida" ne'ebé akontese iha sentru votasaun Opa, iha munisípiu Bobonaro, úniku hosi sentru hamutuk 885 ne'ebé maka hetan.

Alcino Baris la dramatiza kazu no afirma ona katak iha eleisaun sira iha pasadu akontese ona kazu hanesan no iha mekanizmu administrativu sira hodi rezolve diverjénsia ne'e.

"Iha de'it problema sira iha sentru votasaun ida ne'ebé iha kontajen ida ne'ebé la'ós klaru tomak", nia hatete.

"Ami sei rezolve no karik sei iha problema, ami bele husu autorizasaun ba Tribunal Rekursu hodi loke fali urna no konfirma fali kontajen fíziku hosi votu sira hodi haree saida maka akontese, hodi halo koresaun ba rejistu", nia esplika.

Hafoin rezolve tiha buat hotu, CNE "elabora rejistu hosi apuramentu hosi rezultadu nasional provizóriu sira no fiksa iha sede", entre loron-kinta no loron-domingu iha semana ne'e, haktuir hosi kalendáriu eleitoral ofisial ne'ebé publikadu.

Hafoin ne'e sei loke prazu ida ba loron tolu ba interpozisaun hosi rekursu sira hosi rezultadu nasional sira no Tribunal Rekursu maka sei foti desizaun ida kona-ba rekursu sira ne'e (to'o loron 24 Maiu).

Tuir lei, Tribunal iha entre loron-sábadu, 26 Maiu, to'o loron-domingu, 27 Maiu, hodi analiza dokumentasaun ikus tomak ne'ebé haruka hosi CNE, publika desizaun iha loron 28 Maiu.

ho Lusa

 


Comentários

Critério de publicação de comentários