Pájina aktualizada iha 10:28h, segunda-feira 22 Outubru

AMP hein katak Mari Alkatiri demiti hosi Oecusse

16 de Maio de 2018, 00:23

Xanana Gusmão ho Taur Matan Ruak, líder hosi koligasaun ne'ebé manán iha lejislativu loron-sábadu, iha Timor-Leste, hatete iha loron-tersa ne'e katak hein atu Mari Alkatiri "demiti", hanesan nia promete ona, hosi responsável rejiaun administrativu espesial Oecusse nian.


"Ami nia argumentasaun eleitoral maka, bainhira ami manán, señór Mari sei sai. Daruak: señór Mari promete ona kata, bainhira la to'o votu rihun 20 resin, sei rezigna aan", hatete hosi Taur Matan Ruak, númeru daruak hosi Aliansa Mudansa ba Progresu (AMP), iha konferénsia imprensa.

"Ami hein hela atu nia rezigna, hanesan 'gentleman', nu'udar polítiku ne'ebé kumpri nia liafuan", hatutan hosi líder AMP, Xanana Gusmão.

Komentáriu sira mosu iha sekuénsia hosi AMP nia vitória iha lejislativu sira loron-sábadu liubá, ne'ebé AMP konkista maioria absoluta ida hosi fatin 34 entre fatin 65 iha Parlamentu Nasional.

Rezultadu ida ne'ebé hamosu supreza akontese iha Rejiaun Administrativu Espesial Oecusse-Ambeno (RAEOA), ne'ebé AMP halakon Frente Revolucionária do Timor-Leste Independente (Fretilin), hosi Mari Alkatiri - ne'ebé jere ona rejiaun durante tinan barak nia laran - ho diferensa ida liu votu 11.600 resin.

Maski líder sira hosi Fretilin kontinua jere rejiaun, partidu hetan de'it votu 10.800 kontra votu 22.400 resin hosi AMP.

Lakon ne'e halo Arsénio Bano - ne'ebé kaer kargu nu'udar prezidente interinu RAEOA nian hodi substitui Mari Alkatiri, bainhira Alkatiri asumi knaar primeiru-ministru nian iha 2017 - halo pedidu deskulpa públiku ida iha Facebook.

Prinsipal líder na'in rua hosi Aliansa Mudansa ba Progresu (AMP) - Xanana Gusmão ho Taur Matan Ruak - halo ona, iha loron-tersa ne'e, konferénsia imprensa dahuluk hamutuk hafoin hatene tiha rezultadu hosi kontajen munisipal hosi votu.

Enkontru ho jornalista sira hetan mós prezensa hosi sekretáriu-jeral sira hosi partidu tolu ne'ebé halo parte iha AMP, Francisco Kalbuadi Lay (CNRT), Fidelis Magalhães (PLP) ho José Agostinho da Silva (KHUNTO).

Votu iha loron-sábadu fó ba AMP maioria absoluta ida ho fatin 34 hosi fatin 65 iha Parlamentu Nasional (liu votu rihun 305 ka 49,56% hosi total), nune'e permiti harii Governu konstitusional daualuk lahó apoio adisional.

Iha fatin daruak maka okupa hosi Fretilin, ne'ebé lidera ona koligasaun minoritáriu hosi Governu anterior, no hetan votu besik rihun 211 ka 34,27% hosi total, mantén nune'e númeru deputadu hanesan, na'in 23.

Iha Parlamentu iha mós Partidu Demokrátiku (PD), parseiru Fretilin nian iha Governu dahitu, ne'ebé lakon deputadu na'in rua hela de'it ho deputadu na'in lima no hetan ona votu kuaze rihun 49 ka 7,95% hosi total.

ho Lusa

 


Comentários

Critério de publicação de comentários