Pájina aktualizada iha 10:28h, segunda-feira 22 Outubru

Timor-Leste/Eleisaun: Kontinua hala'o prosesu verifikasaun ba votu sira

16 de Maio de 2018, 21:08

Komisaun Nasional Eleisaun (CNE) timoroan nian konklui ona verifikasaun hosi votu sira lejislativu loron-sábadu nian iha munisípiu rua hosi munisípiu 13 iha Timor-Leste, besik hakotu mós prosesu iha munisípiu haat seluk, anunsia iha loron-kuarta ne'e.


To'o final loron-kuarta ne'e, oras lokal, hakotu ona verifikasaun hosi sentru votasaun hamutuk 241 hosi sentru hamutuk 885, ho prosesu konklui iha Aileu ho Ainaro no besik hakotu iha Baucau, Bobonaro, Kovalima ho Ermera.

Iha konferénsia imprensa, prezidente hosi Komisaun Nasional Eleisaun nian (CNE), Alcino Baris, konfirma ona katak prosesu hala'o hela ho normalidade no kazu sira ne'ebé mosu rezolve ona.

"CNE halo hela verifikasaun hosi rejistu tomak hosi apuramentu iha nível munisipal", nia afirma.

Entre kazu sira ne'ebé importante maka iha kazu hosi suku Opa, iha munisípiu Bobonaro nian ne'ebé maka presiza husu autorizasaun hosi Tribunal Rekursu hodi loke fali urna ida hodi kompara votu sira ne'ebé depozitadu ho sira ne'ebé rejista iha kadernu eleitoral sira.

Kazu seluk ne'ebé hetan iha ligasaun ho sentru votasaun ida iha Díli, iha zona Dom Aleixo, ne'ebé rejistu ida la reflete, loloos, ba informasaun hosi meza tomak votu nian, nune'e implika variasaun ida iha total besik votu 2.000 resin.

Iha kazu ne'e, iha sala rejistu ida iha ata, ne'ebé, maski nune'e, asina hosi fiskal sira partidu sira nian no agora sei halo koreasaun nesesáriu sira, esplika hosi Alcino Baris.

Prezidente CNE nian hatete ona katak aprezenta ona, durante verifikasaun hosi votu reklamadu iha Díli, rekursu sira kona-ba boletin votu tolu ne'ebé maka CNE konsidera hanesan nulu maibé kestiona hosi partidu polítiku sira.

Agora daudaun, maski hosi verifikasaun, laiha indikasaun ruma ba problema todan sira ne'ebé afeta informasaun global sira hosi kontajen votu nian.

Dezde hahú verifikasaun no tabulasaun nasional, ekipa sira CNE nian no fiskal sira hosi partidu sira rezolve ona votu reklamadu hamutuk 182 hosi votu reklamadu 600 iha nível nasional, iha kazu sira ne'ebé refere ba Aileu, Ainaro ho Baucau.

Hosi votu hamutuk 132, votu 13 konsidera mamuk, votu 91 ba Aliansa Mudansa ba Progresu (AMP), votu 64 ba Frente Revolucionária do Timor-Leste Independente (Fretilin), votu lima ba Partidu Demokrátiku (PD) ho votu haat ba Frente Dezenvolvimentu Demokrátiku (FDD).

Iha final dadeer nian rezolve mós votu reklamadu hamutuk 132 hosi Díli, ne'ebé votu 79 konsidera hanesan nulu, votu 41 fó ba AMP no 12 ba Fretilin.

Iha Baucau, konfirma ona katak númeru hosi votu reklamadu sira maka hamutuk 63 no la'ós 59 no iha Ermera hamutuk 73 no la'ós 74.

Kontajen munisipal konfirma ona katak AMP manán ona eleisaun lejislativu sira ho votu liu rihun 305 ka 49,56% hosi total, ka hetan mandatu 34 hosi fatin 65 iha Parlamentu Nasional (liu votu rihun 305 ka 49,56% hosi total) no posibilidade harii Governu konstitusional daualuk lahó apoio adisional.

ha fatin daruak maka okupa hosi Fretilin, ne'ebé lidera ona koligasaun minoritáriu hosi Governu anterior, no hetan votu besik rihun 211 ka 34,27% hosi total, mantén nune'e númeru deputadu hanesan, na'in 23.

Iha Parlamentu iha mós Partidu Demokrátiku (PD), parseiru Fretilin nian iha Governu dahitu, ne'ebé lakon deputadu na'in rua hela de'it ho deputadu na'in lima no hetan ona votu kuaze rihun 49 ka 7,95% hosi total.

Hafoin hakotu tiha prosesu verifikasaun ne'e, CNE "elabora rejistu ba apuramentu hosi rezultadu nasional provizóriu isra no afiksa iha sede", entre loron-kinta no loron-domingu iha semana ne'e, haktuir hosi kalendáriu eleitoral ofisial ne'ebé publikadu.

Hafoin ne'e sei loke prazu ida durante loron tolu ba interpozisaun hosi rekursu sira hosi rezultadu nasional sira, Tribunal Rekursu maka tenki foti desizaun ida kona-ba eventual rekursu sira ne'e (to'o loron 24 Maiu).

Tuir lei, Tribunal iha entre loron-sábadu, 26 Maiu, to'o loron-domingu, 27 Maiu, hodi analiza dokumentasaun ikus tomak ne'ebé haruka hosi CNE, publika desizaun iha loron 28 Maiu.

ho Lusa

 


Comentários

Critério de publicação de comentários