Pájina aktualizada iha 11:18h, segunda-feira 22 Outubru

Autoridade Palestinianu bolu embaixador sira iha nasaun haat hosi Europa

16 de Maio de 2018, 23:45

Diresaun palestinianu anunsia, iha loron-kuarta ne'e, nia embaixador sira iha nasaun haat hosi Uniaun Europeia, ne'ebé haruka reprezentante sira ba serimónia israelita hodi asinala abertura hosi embaixada Estadus Unidus nian iha Jeruzalén.


Nasaun haat ne'e maka Áustria, Hungria, Repúblika Xeka ho Roménia, indika ona hosi Ministériu Negósiu Estranjeiru palestinianu iha Cisjordánia okupadu.

Reprezentante sira hosi nasaun sira ne'e partisipa ona iha serimónia ida ho delegasaun norte-amerikanu iha Ministériu Negósiu Estranjeiru israelita iha loron-domingu, antes inaugurasaun hosi embaixada Estadus Unidus nian iha Jeruzalén.

Iha loron-tersa, Autoridade Palestinianu anunsia ona desizaun hodi bolu nia reprezentante iha Estadus Unidus, Hossam Zomlot.

Nasaun sanulu resin, entre sira barak liu europeu, la asisti ba serimónia ne'e iha Ministériu Negósiu Estranjeiru israelita ne'ebé maka konvida ona embaixador ho responsável sira negósiu nian hamutuk 86, no na'in 40 maka aseita ona.

Maioria hosi Estadu europeu sira, entre sira maka Portugal, España, Reinu Unidu, Fransa ho Itália, halo ona boikot ba serimónia tanba la konkorda ho mudansa hosi embaixada iha Telavive ba Jeruzalén, ne'ebé fahe ona konsensu hosi komunidade internasional.

Prezidente norte-amerikanu, Donald Trump, anunsia ona mudansa hosi embaixada iha fulan-Dezembru, bainhira nia rekoñese Jeruzalén hanesan Israel nia kapital, hamosu krítika sira hosi maioria komunidade internasional no hirus hosi ema palestinianu sira.

Sira reivindika Jeruzalén oriental, okupa iha tinan 1967 no hafoin ne'e aneksadu hosi Israel hanesan kapital hosi Estadu Palestina ida.

ho Lusa

 


Comentários

Critério de publicação de comentários