Pájina aktualizada iha 10:28h, segunda-feira 22 Outubru

Trump ho Kim asina dokumentu hamutuk bainhira hakotu simeira

12 de Junho de 2018, 21:57

Prezidente Estadus Unidus nian ho líder norte-koreanu asina, iha loron-tersa ne'e, iha Singapura "dokumentu detalladu ho importante ida", haktuir hosi Donald Trump, no ne'ebé sei permiti ba "mundu haree mudansa boot ida", subliña hosi Kim Jong-un.


Iha simeira nia rohan, Prezidente Estadus Unidus anunsia konferénsia imprensa ida ba oras hirak tuirmai hodi hato'o detalle ba konteúdu hosi dokumentu ne'ebé asina hosi líder na'in rua ne'ebé iha ona diskursu final ida marka ho sintonia: "parte rua sei senti impresionadu ho rezultadu sira", sira destaka.

Kim Jong-un klasifika ona simeira hanesan "enkontru ida no dokumentu istóriku ida", hodi garanti katak "mundu sei haree mudansa boot ida".

Donald Trump asegura katak "relasaun ho Koreia-Norte no península koreanu sei sai di'ak liu".

Simeira istóriku entre Prezidente Estadus Unidus nian ho líder Koreia-Norte hala'o iha loron-tersa ne'e, iha Singapura, no hahú ho apertu liman simbóliku entre Donald Trump ho Kim Jong-un.

Ne'e hanesan enkontru dahuluk entre líder sira hosi nasaun rua ne'e hafoin kuaze tinan 70 nia laran hosi konfrontu polítiku sira tanba Funu Koreia no tinan 25 nia laran nakonu ho tensaun kona-ba programa nuklear hosi Pyongyang.

Reuniaun ne'e akontese hafoin, iha tinan 2017, tensaun sira aumenta to'o iha nível inéditu sira dezde final hosi Funu Koreia (1950-53), hasoru teste nuklear oioin ne'ebé halo hosi Pyongyang no liafuan funu sira nian hosi Washington.

Simeira hahú hafoin tuku 09:00 iha loron-tersa (oras lokal), iha hotel ida iha Singapura, hafoin atividade diplomátiku maka'as iha Washington, Singapura, Pyongyang ho iha fronteira entre Koreia rua, ne'ebé iha ona anúnsiu, ameasa sira, kanselamentu ho retratasaun derepente.

ho Lusa

 


Comentários

Critério de publicação de comentários