Pájina aktualizada iha 10:28h, segunda-feira 22 Outubru

Livru indika katak Anne Frank nia família karik hetan traisaun hosi feto judia ida

13 de Junho de 2018, 00:53

Livru foun ida ne'ebé publika iha Holanda hatete katak família Frank hetan traisaun hosi feto judia ida, Ans van Dijk, ne'ebé ezekutadu iha final hosi Funu Mundial daruak tanba nia kolaborasaun ho rejimi nazi.


Livru, 'De achtertuin van het Achterhuis' (Kintal hosi Anexu Sekretu, iha tradusaun livre), hakerek hosi Gerard Kremerm, avansa katak Ans van Dijk nia naran sai hanesan informadora hosi rejimi ne'ebé maka halo traisaun ba família.

Ans van Dijk, ne'ebé konfesa katak halo traisaun ba ema na'in 125, refere tiha ona iha investigasaun sira seluk maibé nunka iha prova konkluzivu hosi nia ligasaun ba família Frank.

Kremer, ho tinan 70, konta fali epizódiu ida ne'ebé maka nia aman, membru hosi rezisténsia holandeza, haree van Dijk ko'alia ho ofisial nazi sira iha fulan-Agostu 1944 kona-ba uma ida iha kanal Prinsengracht, iha sidade holandeza Amesterdaun.

Teoria ne'e hanesan ida ne'ebé foun liu kona-ba relatu hosi informador ne'ebé mosu iha detensaun hosi família sira ne'ebé hela iha anexu sekretu iha Prinsengracht.

Parte barak hosi teoria sira ne'e ho baze hosi xamada telefónika ida ne'ebé simu hosi SS (“Schutzstaffel” – tropa protesaun nian) iha Amesterdaun, iha loron 04 Agostu 1944, halo hosi ema ida ne'ebé mate ona iha tinan 1945 ne'ebé maka nunka deskonfia.

"Ha'u la fiar katak ami sei konsege hetan resposta ida maibé tinan-tinan mosu nafatin teoria sira", esplika hosi istoriador holandés David Barnouw, espesialista ida kona-ba Anne Frank nia istória.

Investigasaun foun hosi Muzeu Anne Frank rasik, halo hosi Gertjan Broek iha 2016, estabelese hipóteze ida katak laiha traisaun ida, no sekretu alemaun sira tama iha uma holandeza nian iha tinan 1944 hodi halo investigasaun hosi kazu fraude ida hosi kupaun hahán nian, hodi hetan, durante rejistu, ho anexu sekretu ne'ebé hanesan hela fatin hosi Fritz Pfeffer no família sira Frank ho Van Pels.

Broek konsidera mós katak laiha prova konkluzivu sira hasoru Ans van Dijk iha kazu Anne Frank nian.

Agora daudaun, eis-ajente FBI ida, Vice Pankoke, hahú ona nia investigasaun rasik hosi akontesimentu, ne'ebé refere hanesan kazu arkivadu, hodi buka ligasaun ho dokumentu tomak ne'ebé disponível kona-ba kazu, hahú hosi rejistu telefone sira nian to'o karta hodi kaer ema iha área.

Anunsia ona akordu ida ne'ebé haree ba publikasaun hosi livru ida ho lian 13 kona-ba investigasaun ne'ebé halo hosi Pankoke.

Adolesente ho família tama ona iha klandestinidade iha fulan-Jullu 1942 iha apartamentu sekretu hosi empreza familiar, ne'ebé sira bolu "anexu", hodi subar hosi nazi sira.

Família hela subar iha fatin ne'e durante tinan rua, to'o fulan-Agostu 1944, bainhira ema deskobre no hetan deportasaun.

Iha apartamentu ne'e maka adolesente hakerek nia diáriu, ne'ebé retrata nia moris ho família nia moris, nune'e mós hosi ema sira seluk, hanesan obra ida ne'ebé maka ema le liu iha mundu, ne'ebé maka fa'an ona livru hamutuk millaun 30 resin no hetan ona tradusaun ba lian hamutuk 67.

Anne Frank mate ho isin-manas tifoide iha inísiu tinan 1945 iha kampu konsentrasaun Berge-Belsen, loron balun hafoin nia feton nia mate.

Nia aman, Otto, sai hanesan sobrevivente úniku hosi anexu.

ho Lusa

 


Comentários

Critério de publicação de comentários