Pájina aktualizada iha 17:59h, kuarta-feira 18 Jullu

Eis-Prezidente no primeiru-ministru tuir Xanana Gusmão nia dalan

21 de Junho de 2018, 00:43

Taur Matan Ruak, nomeadu iha loron-kuarta ne'e nu'udar primeiru-ministru Timor-Leste nian, ho tomada pose marka ba loron-sesta, fó hakat foun ida iha kareira ida ne'ebé tuir tebes Xanana Gusmão, nia antesesor, nia lala'ok.


Hanesan mós líder istóriku timoroan, Matan Ruak komanda ona frente armada hosi rezisténsia timoroan nian, sai ona nu'udar Prezidente Repúblika no agora sei nu'udar primeiru-ministru, hodi asumi lideransa hosi Governu ida ne'ebé mosu hosi koligasaun pré-eleitoral ida ne'ebé maka nunka akontese.

Ezekutivu ida ne'ebé Xanana Gusmão rasik anunsia ona katak sei kaer, maibé nia rasin ikusmai sei kaer knaar "númeru daruak" ida, ministru ida konselleiru primeiru-ministru nian.

Liu duké formalizasaun hosi vitória Aliansa Mudansa ba Progresu (AMP) nian - kria ona formalmente iha tinan 2017 nia rohan - Taur Matan Ruak nia momentu to'o iha xefia Governu nian hanesan vitória ida ba Partidu Libertasaun Popular (PLP) ne'ebé nia lidera iha de'it tinan ida nia laran.

Guerrilleiru durante parte barak nia moris, sindikalista, eis-xefe Estadu Maior Jeneral hosi Forsa Defeza Timor-Leste nian (F-FDTL), Taur Matan Ruak, hili ona hodi la kandidata ba Prezidénsia Repúblika maibé hakarak tenta fatin ida ezekutivu liu.

Ruak nia biografia - ne'ebé xefia ona iha tinan hirak ikus hosi rezisténsia nian asuwa'in sira Falintil nian, frente armada rezisténsia nian - iha ligasaun, íntimu, ho istória Timor-Leste nian.

Taur Matan Ruak hanesan naran funu nian, naran sarani maka José Maria de Vasconcelos, moris iha fulan-Outubru tinan 1956 iha Baguia, distritu Baucau, maibé hela iha Díli, hodi frekuenta eskola primária.

Ho tinan 15, fila ba Baucau, serbisu iha pouzada sidade nian, maibé liutiha fulan 18 organiza iha lokal greve dahuluk, hodi reklama saláriu di'ak, alimentasaun di'ak no kondisaun serbisu ne'ebé di'ak. Hotu iha tribunal.

Liutiha tinan rua, iha kapital timoroan, ho serbisu iha otel ida, organiza reklamasaun foun, tanba motivu hanesan. Aguenta tinan ida iha serbisu ne'e no iha tinan 1974 organiza greve foun no fila fali ba tribunal.

Iha prosesu reklamasaun ne'ebé maka akontese 25 Abril 1974. Ruak apoia Fretilin iha momentu ne'ebá no iha tinan tuirmai, bainhira akontese invazaun indonéziu, halai ba foho no hamutuk ba ezérsitu ne'ebé harii, Falintil.

Partisipa hanesan guerilleiru iha funu sira hasoru ezérsitu indonéziu iha fatin sira hanesan Díli, Aileu, Maubisse, Ossu, Venilale, Uatulari ka Laga no, neineik, hahú kaer pozisaun sira xefia nian iha grupu guerilleiru nian.

Nia nomeasaun ofisial dahuluk halo hafoin reuniaun hosi Konsellu Superior hosi Setór Sentru-Leste, iha Venilale, iha tinan 1976 nia rohan.

Hahú iha ne'e maka sai nu'udar komandante hosi kompañia sira no adjuntu hosi komandante sira entre tinan 1976 no 1979.

Iha tinan ne'ebá, tanba golpe sériu oioin iha forsa rezisténsia sira, fó ona ba Matan Ruak knaar hodi agrupa fali Falintil iha rejiaun leste, no mós misaun hodi lokaliza sobrevivente sira hosi kompañia ida.

No iha tempu ne'ebá, hetan traisaun, kaer hosi militar indonéziu sira. Liutiha loron 23 iha kadeia, konsege halai no hamutuk fali ho Falintil iha foho.

Iha tinan 1981 sai nu'udar kriador ida hosi Konsellu Nasional ba Rezisténsia Revolusionáriu (CRRN, antesesor hosi CNRM ho CNRT) no sai nu'udar adjuntu hosi Estadu-Maior hosi Falintil, bainhira komandante iha Xefe movimentu nian maka Xanana Gusmão.

Ho funsaun sira iha ponta leste iha tinan 1983, iha tinan tolu tuirmai hetan transferénsia ba setór osidental. Iha tinan 1986 sai nu'udar visi Xefe Estadu-Maior no tanba ne'e sai hanesan responsável ba operasaun militar sira iha teritóriu tomak.

Bainhira kaer Xanana Gusmão, lansa Taur ba kargu Xefe Estadu-Maior Falintil nian.

Hafoin kaer Komandante Mau Huno, iha loron 05 Abril 1993, Komisáriu Polítiku Nino Konis Santana nomeadu nu'udar Komandante FALINTIL nian.

Militar indonéziu sira kaer no oho Daitula iha loron 25 Junho 1997 no Konis Santana nia asidente mate, menus tinan ida, iha loron 11 Marsu 1998, husik dala ida tan lideransa abaladu. Komandante Taur Matan Ruak sai nune'e nu'udar Komandante Operasional Falintil nian.

Ditudura Suharto nian monu no abertura Indonézia hamosu konsulta popular iha loron 30 Agostu 1999, bainhira Matan Ruak kaer responsabilidade iha Falintil, ne'ebé impede ona konfrontu sira ho milísia sira, maski bainhira teritóriu besik hetan destruisaun tomak.

Xanana Gusmão sai hosi Falintil iha loron ne'ebé maka selebra tinan 25 kriasaun forsa nian, iha loron 20 Agostu 2000, no Taur Matan Ruak nomeadu nu'udar Komandante iha Xefe.

Iha fulan-Fevereiru 2001, ONU nomeia Taur nu'udar brigadeiru-jeneral hodi komanda Forsa Defeza Timor-Leste nian (FDTL), kargu ne'ebé depois nia demiti iha fulan-Setembru 2011 hodi kandidata ba xefe Estadu, kargu ne'ebé nia asumi iha loron 20 Maiu 2012.

Durante hala'o knaar ne'e, nia halo istória: hanesan nia promete ona, konsege vizita suku ida hosi suku hamutuk 442 iha nasaun laran.

ho Lusa

 


Comentários

Critério de publicação de comentários