Pájina aktualizada iha 17:59h, kuarta-feira 18 Jullu

Parlamentu timoroan nega autorizasaun ba Prezidente Repúblika hodi halo viajen ba Portugal

09 de Julho de 2018, 19:28

Parlamentu timoroan nega ona, iha loron-segunda ne'e, ho votu hosi maioria ne'ebé apoia Governu, autorizasaun ne'ebé maka husu hosi Prezidente Repúblika, Francisco Guterres Lu-Olo, ba vizita Estadu ida ba Portugal ne'ebé tuir loloos akontese iha semana ne'e.


Xumbu ne'e konfirma ona ho votu kontra hamutuk 35, hosi deputadu sira hosi bankada tolu ne'ebé halo parte iha Aliansa Mudansa ba Progresu (AMP), maka Congresso Nacional da Reconstrução Timorense (CNRT), Partidu Libertasaun Popular (PLP) ho Kmanek Haburas Unidade Nacional Timor Oan (KHUNTO) no mós hosi bankada Frente Mudansa (FM)/União Democrática Timorense (UDT).

Pedidu autorizasaun nian iha votu konkorda hamutuk 29, hosi deputadu sira Frente Revolucionária do Timor-Leste Independente (Fretilin), hosi Partidu Demokrátiku ho Frente Dezenvolvimentu Demokrátiku (FDD).

"Parlamentu la autoriza viajen hosi señór Prezidente nian ba Portugal", konfirma hosi Arão Noé, prezidente parlamentu nian.

António da Conceição, deputadu hosi Partidu Demokrátiku (PD) tenta, iha intervensaun ikus ida, apela ba "votu konsiénsia nian" hosi deputadu sira hodi fó "importánsia no interese ba nasaun hosi vizita Estadu nian".

"Estadu ho povu nia interese tenki hanesan dahuluk hosi diverjénsia sira. Ne'e hanesan vizita importante ida ne'ebé ami apoia", nia hatete.

António Benevides, hosi FDD, hamutuk mós ho apelu ne'e, hodi afirma katak "hanesan kestaun hosi dignidade Timor nian", hodi refere katak "halo ona preparativu sira ba viajen no gasta ona osan sira ne'ebé karik sei la bele rekupera".

Iha inísiu hosi sesaun plenáriu iha loron-segunda ne'e iha parlamentu nasional, deputadu Francisco Vasconcelos, hosi PLP, le ona deklarasaun ida hodi naran bankada sira AMP nian, FM ho UDT ne'ebé anunsia no justifika ona nia pozisaun.

"AMP, konsiente hosi knaar Parlamentu Nasional nian, ho baze iha Konstituisaun Repúblika, no hodi defende interese lulik hosi Povu nian, sei la autoriza deslokasaun Prezidente Repúblika nian ba estranjeiru", hatete hosi deputadu Francisco Vasconcelos.

Desizaun ne'e hatán ba "difikuldade polítiku atual, ne'ebé hamosu rasik [hosi] Prezidente", bainhira la fó pose ba membru Governu na'in 11 hosi AMP, halo nasaun tama "iha situasaun polítika ida ne'ebé la normal", nia esplika.

"Agora daudaun, nasaun, ita nia povu, presiza atu xefe Estadu sai prezente iha teritóriu nasional no hatudu katak bele hasoru responsabilidade konstitusional importante sira ne'ebé maka kompete ba nia, kontribui ba estabilidade polítika, ba governabilidade hosi Estadu no ba dame sosial", nia deklara.

Opozisaun kritika ona desizaun, ho Adriano Nascimento (PD) hatete katak hanesan "juízu sala ida, polítika ida ne'ebé falsu no dezastre diplomátiku ida hodi impede Prezidente Repúblika hodi reforsa relasaun bilateral ho Portugal".

Ba David Ximenes, deputadu hosi bankada Fretilin, postura hosi koligasaun Governu nian hatudu "infatilizmu polítiku" hosi koligasaun Governu nian.

"Hatudu katak la halo polítika saudável ida, maibé polítika ki'ik, ba interese sira grupu nian. Deputadu sira, bainhira eleitu, sai hanesan reprezenta sira hosi povu tomak nian. Vizita ne'e hanesan kestaun ida Estadu nian", nia subliña.

Konstituisaun timoroan determina katak Prezidente "labele sai hosi teritóriu nasional lahó konsentimentu antes hosi Parlamentu Nasional", no bainhira la kumpri ezijénsia ne'e "determina atu bele lakon kargu".

Antes, Prezidente Repúblika husu ona autorizasaun hodi halo vizita ba Portugal no, iha viajen hanesan ba estranjeiru, ba vizita Cabo Verde ne'ebé tuir loloos sei partisipa iha simeira hosi Komunidade Nasaun sira Lian Portugeza nian (CPLP).

Iha semana liubá, Lu-Olo desidi kansela ona viajen ba Sal, tanba situasaun iha Timor-Leste maibé mantén hanoin hodi vizita Portugal.

ho Lusa

 


Comentários

Critério de publicação de comentários