Pájina aktualizada iha 03:40h, tersa-feira 12 Dezembru

Prezidente justifika desizaun hodi la fó pose ba membru balun hosi Governu

09 de Julho de 2018, 22:33

Iha loron-segunda ne'e, Prezidente timoroan defende fali desizaun hodi la fó pose ba membru balun hosi Governu, hodi evita atu sosiedade sivil "lakon konfiansa iha governante no iha instituisaun sira".


"Ha'u simu nafatin, tuir dalan oioin, ezijénsia ne'e, hosi parte organizasaun sira nian no mós hosi parte kompatriota timoroan sira nian: atu membru sira hosi Governu tenki hanesan ema sira ne'ebé kompetente, livre hosi alegasaun sira ka akuzasaun sira ba violasaun todan gravidade nian, ne'ebé bele hamosu situasaun inkompatível ho kargu", Francisco Guterres Lu-Olo hatete iha Díli.

"Maioria hosi ita nia povu la hatene konseitu jurídiku sira, nune'e mós hanesan prezunsaun hosi inosénsia no kastigu tranzitadu iha julgadu, maibé hatene sinal vizível sira hosi korupsaun. Ita nia povu hatene ona korupsaun jeneralizasaun iha ita nia nasaun", nia insisti.

Lu-Olo ko'alia hafoin fó pose ba Filomeno Paixão, eis-númeru daruak hosi Forsa sira Defeza Timor-Leste nian (F-FDTL), nu'udar ministru Defeza ba Governu daualuk, iha serimónia ida iha Palásiu Prezidensial iha Díli, no bainhira falta fó pose elementu hosi ezekutivu hamutuk sanulu resin.

Formasaun hosi Governu daualuk iha hela problema, ho Lu-Olo rekuza fó pose ba membru na'in 11 ne'ebé nomeia hosi Aliansa Mudansa ba Progresu (AMP) no hosi primeiru-ministru, Taur Matan Ruak, na'in sia tanba karik sira nia naran "identifika iha instánsia judisial kompetente sira" no na'in rua tanba iha "perfil étiku ne'ebé kontroversu".

u-Olo hatete ona katak "sosiedade sivil" hatudu "deskonfiansa ba membru balun ne'ebé maka hato'o hosi señór primeiru-ministru Taur Matan Ruak".

"Hasoru situasaun ne'e, hanesan ha'u nia knaar, nu'udar Prezidente Repúblika, evita atu ita nia povu lakon konfiansa iha ita nia governante ho ita nia instituisaun sira", nia afirma.

Xefe Estadu insisti ona katak nia atua "ho respeitu ba Konstituisaun" no hodi kumpri "nafatin prinsípiu hosi separasaun no interdependénsia kbiit sira nian", ne'ebé nia aplika ona iha kestaun hosi nomeasaun ba membru sira Governu nian.

"Ha'u la halo veto ruma ba elementu ne'ebé maka hato'o hosi primeiru-ministru ba nia elenku governamental durante tinan lima. Ha'u husu de'it ba señór primeiru-ministru hodi hanoin kona-ba nia proposta sira ba nomeasaun ba membru sira Governu nian", nia hatete.

"Membru sira ne'ebé simu ona pose, ne'ebé livre hosi obstákulu legal ruma, bele kaer sira nia mandatu lahó interupsaun no nune'e sei garanti estabilidade governativu no mós kredibilidade hosi Governu daualuk", nia afirma.

Prezidente hatete katak iha "fiar" atu primeiru-ministru "sei halo buat hotu hodi integra" iha Governu "membru kredível sira, efisiente no efetivu ne'ebé bele garanti governasaun transparente ida no ho susesu iha tinan lima oinmai".

Iha loron-segunda ne'e, tuir loloos, simu pose Xanana Gusmão nu'udar ministru Estadu, konselleiru hosi primeiru-ministru no ministru Planeamentu no Investimentu Estratéjiku nian, Alfredo Pires nu'udar ministru Petróleu ho Mineral nian, no Rogério Araújo Mendonça nu'udar sekretáriu Estadu Peska nian.

Maibé, primeiru-ministru informa ona tuir dalan ofisial katak "tanba razaun polítika sira" maka Xanana Gusmão, Alfredo Pires ho Rogério Araújo Mendonça "sei la simu pose iha loron-segunda ne'e", refere hosi Lu-Olo.

Ne'e hanesan ba dala rua maka Xanana Gusmão hetan nomeasaun nu'udar ministru, ho kompeténsia alargadu iha dekretu daruak ne'e, no la simu pose.

ho Lusa

 


Comentários

Critério de publicação de comentários