Pájina aktualizada iha 04:48h, tersa-feira 26 Setembru

Governu timoroan sei aprova medida sira hodi hetan fali fundu iha kofre Estadu nian

11 de Julho de 2018, 00:09

Iha loron-kuarta ne'e Governu Timor-Leste sei halo reuniaun hodi aprova medida sira ne'ebé permiti reforsa kofre sira Estadu nian durante fulan-Jullu ho fulan-Agostu, anunsia hosi primeiru-ministru timoroan iha loron-tersa.


Taur Matan Ruak ko'alia ba jornalista sira iha Palásiu Prezidensial, hafoin reuniaun ida ne'ebé konvoka hosi Prezidente Francisco Guterres hodi ko'alia kona-ba Orsamentu Timor-Leste nian, nasaun ne'ebé maka moris ho duodésimu dezde loron 01 Janeiru liubá.

"Governu daualuk preokupadu hela ho saláriu sira, vensimentu sira no tusan sira ne'ebé maka tenki selu. Ha'u garanti ona ba señór Prezidente katak ami sei ko'alia hodi iha osan hodi sustenta mákina Estadu nian ba fulan-Jullu ho fulan-Agostu", hatete hosi governante.

Tema "sei haree iha loron-kuarta ne'e iha Konsellu Ministru sira", adianta hosi Taur Matan Ruak, hodi hatutan katak objetivu maka garanti katak iha osan hodi halo funsionamentu normal durante fulan-Jullu ho fulan-Agostu.

Lei hosi Fundu Petrolíferu, fonte prinsipal hosi reseita sira ba kofre sira Estadu nian, determina katak transferénsia ruma presiza atu Governu aprezenta ba Parlamentu relatóriu sira kona-ba estimativu hosi rendimentu sustentável iha tinan fiskal, nune'e mós sertifikasaun hosi folin ne'e hosi auditor independente ida.

Matan Ruak garanti ona katak ezekutivu sei kumpri prazu loron 30 nia laran hodi aprezenta programa Governu nian ba parlamentu, ne'ebé hotu iha loron 22 Jullu, no hafoin ne'e sei aprove konta sira ba restu tinan ne'e nian no ba tinan 2019.

Iha Parlamentu, iha loron-segunda ne'e, koligasaun hosi Aliansa Mudansa ba Progresu (AMP), ne'ebé sustenta Governu, afirma ona katak Estadu laiha osan sufisiente ba "funsionamentu normal" ida iha fulan ne'e.

Francisco Vasconcelos, deputadu hosi Partidu Libertasaun Popular (PLP), partidu ida ne'ebé maka halo parte iha AMP iha Parlamentu Nasional, indika ona katak kofre Estadu nian "iha de'it osan hamutuk millaun 20 resin dolár norte-amerikanu nian".

"Estadu presiza osan millaun 80 resin hodi bele garanti nia funsionamentu normal, iha fulan-Jullu ne'e", nia hatete, iha sesaun plenáriu, hodi justifika desizaun hodi xumba pedidu autorizasaun hosi xefe Estadu, Francisco Guterres Lu-Olo, hodi vizita Portugal iha semana ne'e.

Kona-ba problema relasionadu ho tomada pose hosi membru balun Governu nian, Taur Matan Ruak konfirma ona katak "seidauk iha" suar mutin ida maibé kontinua diálogu ho xefe Estadu.

"Señór Prezidente hatete no repete katak sei dialoga nafatin ho PM. Ha'u mós insisti nafatin. Di'ak liu kontinua ko'alia hodi hetan solusaun ida ba kazu ne'e. Tuir ha'u nia hanoin, solusaun tenki hanesan solusaun polítika no kompromisu ida", nia hatete.

ho Lusa

 


Comentários

Critério de publicação de comentários