Pájina aktualizada iha 04:48h, tersa-feira 26 Setembru

PR xinés anunsia euro biliaun resin hodi apoia nasaun árabe sira

11 de Julho de 2018, 01:13

Prezidenti Xina nian, Xi Jinping, promete iha loron-tersa ne'e ba nasaun arabe sira katak sei fo empréstimu hamutuk dolares biliaun 23 no asisténsia umanitáriu, hodi reforsa Pequim nian influénsia iha regiaun.


"Xina preparadu ona atu iha knaar importante iha dame no estabilidade iha rejiaun ne'e nian", Xi hatete durante konferénsia ida iha kapital Xina nian ho líder árabe sira, ne’ebé hatete mós katak Siria, Iémen, Jordánia no Líbano sei simu dolar milliaun 91 iha ajuda umanitaria.

Prezidenti Xina nian mós refere tan katak presiza hodi ko’alia kona-ba situasaun iha Palestina no apela ba parte hirak ne'ebé envolvidu iha konflitu iha Gaza hodi rekupera fali sira nia diálogu "iha tempu badak nia laran" no bele hetan dame no estabelese mekanismu foun sira atu servisu iha diresaun ne'ebé hanesan.

Xi afirma katak, "Ita tenki fo apoiu ne'ebé konkretu liu ba ema palestinianu sira, ha'u hakarak fó yuan milliaun 100.000 ba ajuda ba Palestina sira hodi apoiu sira nia esforsu ba kresimentu ekonomiku no ba sira nia populasaun".

Nia mos hatete tan katak, Xina mos sei oferese ajuda ba organizmu sira hosi ONU ne’ebé apoia hela refujiadu palestinianu sira.

Pequim mos aumenta ona sira nia influénsia entre nasaun árabe sira, no iha ekilíbriu ho Europa no EUA, liuhosi koperasaun iha área sira enerjia, infraestrutura no komersiu.

Xi mós adianta tan katak sei assina deklarasaun ba asaun konjunta hodi bele hadi’a koperasaun iha ámbitu hosi "Rota Foun ba Seda", projetu infraestrutura ida ne'ebé bo’ot no inspira tuir dalan antigu komersiu nian entre Ázia ho Europa.

"Rota Foun ba Seda" ne'e lansa iha tinan 2013 hosi Prezidente Xina, Xi Jinping, no inklui ligasaun feroviariu interkontinetal, portu foun sira, aeroportu sira, sentral eletrisidade sira no fatin ba komérsiu livre, atu nune’e restaura fali dalan komérsiu nian ne'ebé akontese dezde iha tempu Imperiu Romanu, ne’ebé maka uluk uza hosi caravana sira.

"Ida ne'e marka ona baze historiku foun ida iha asosiasaun no koperasaun entre Xina no mundu árabe", nia afirma.

Ho Lusa

 


Comentários

Critério de publicação de comentários