Pájina aktualizada iha 10:28h, segunda-feira 22 Outubru

Eis-ajente no advogadu ne'ebé sai kulpadu ba konspirasaun iha Australia julgadu iha loron-kuarta ne'e

26 de Julho de 2018, 18:24

Julgamentu ba eis-ajente servisu sekretu nian ida no advogadu ida ne'ebé sai kulpadu ba konspirasaun hosi Ministériu Públiku australianu iha asaun ida relasionadu ho negosiasaun fronteira no esplorasaun petrolífera ne'e sei hahú loron-kuarta ne'e.


Eis-ajente hosi Servisu Sekretu Informasaun Australianu ne'e, koñesidu de'it hanesan "Sasin K" no nia advogadu, Bernard Collaery, akuzadu iha loron 28 Juñu liubá hosi Ministériu Públiku tanba halo konspirasaun no agora hetan julgamentu privadu.

Akuzadu sira ne'e sei hetan kastigu másimu tinan rua iha prizaun se karik konsidera sira hanesan kulpadu iha julgamentu ne'e.

Iha kauza maka kesar ida ne'ebé hato'o hosi parte "Sasin K" ne'ebé fó sai kona-ba eskema eskuta ne'ebé maka monta hosi serbisu sekretu australianu sira iha eskritóriu sira hosi Governu timoroan nian iha Díli.

Eskuta sira ne'e karik monta iha tinan 2004 hosi ekipa ida ne'ebé lidera hosi "Sasin K" durante obra rekonstrusaun eskritóriu sira, ne'ebé oferese hanesan koperasaun umanitáriu hosi Australia.

Tuir relatu sira, hosi eskuta sira ne'e, Governu australianu hetan informasaun ne'ebé permite ajuda hodi favorese intensaun australiana sira nian iha negosiasaun ho Timor-Leste ba fronteira tasi no ba kontrolu zona Greater Sunrise nian, rezerva ida ne'ebé riku ho petróleo no gás.

Tratadu ne'ebé tuirmai asina tiha ona, hatudu katak nasaun ida-idak iha 50% ba área hodi explora, maske parte ne'ebé boot rezerva ne'e halo parte iha teritóriu timoroan nian.

Kuandu iha koñesimentu ba ezisténsia ba eskuta sira ne'e, Dilí halo kedas protestu ba tratadu ne'e no aprezenta kesar ida kontra espionajen hosi Canberra nian iha Tribunal Arbitral Haia, hodi argumenta katak akordu sira ne'e hanesan ilegal tanba asaun hosi Governu australianu ne'e.

Timor-Leste hasai akuzasaun ne'e hanesan asaun fiar ida, no iha fulan-Marsu 2018, nasaun rua ne'e asina tratadu foun ida ne'ebé defini fronteira tasi permanente entre nasaun rua ne'e, no hodi halo Timor simu 70% hosi reseita sira ne'ebé mai hosi esplorasaun Greater Sunrise ne'e.

Dezde tinan 2002 maka "Sasin K" ne'e la sai hosi Australia, hafoin operasaun ida ne'ebé organiza hosi ASIO (serbisu sekretu australianu sira) hodi prende tiha dokumentu sira, inklui mós passaporte.

Iha tinan 2016, sasin ne'e la konsegue halo viajen to'o Haia hodi fó nia sasin, tanba Ministériu Negósiu Estranjeiru australianu nega tiha atu halo fali nia passaporte foun.

Kazu ne'e hetan protestu hosi organizasaun no personalidade barak.

Foin lalais ne'e, ativista hosi Movimentu Kontra Okupasaun Tasi Timor kondena Governu australianu ba nia atuasaun no halo komparasaaun ho ditadór indoneziu Suharto.

"Movimentu Kontra Okupasaun Tasi Timor ne'e surpreendidu tanba, iha ohin loron, Governu australianu sei halo saida maka antes sira hanoin ditadór Suharto de'it maka halo durante nia poder".

Movimentu, ne'ebé kompostu hosi organizasaun timoroan barak, kondena akuzasaun sira ne'e, hodi hatete katak iha "motivasaun polítika sira" no atake ida hosi Governu ba demokrasia no liberdade ba espresaun.

Atitude Governu Australia nian ne'e hatudu katak Governu sei halo buat ruma ne'ebé iha vantajen ba interese komersial nasaun nian", maski implika "viola lei internasional no hadook tiha nia viziño ne'ebé kiak", hatete hosi movimentu ne'e.

Atualmente, Timor-Leste hanesan nasaun aziátiku ho Produtu Internu Brutu ne'ebé ki'ik.

Iha inisiu fulan ne'e, eis-diplomata ONU nian ida ne'ebé hamutuk ho ekipa Timor-Leste nian ne'ebé hetan espionajen iha tinan 2004, kritika Justisa australiana ne'e.

Iha deklarasaun ba jornal britániku The Guardian, Peter Galbraith konsidera akuzasaun ba mane na'in rua ne'e hanesan asaun "vingativa ida no laiha sentidu", saida maka Austrália tenki halo maka haluha tiha "epizódiu ne'ebé la'ós hanesan ezemplu ne'e".

Galbraith insiste katak operasaun espionajen kontra nia no funsionáriu sira seluk hosi Timor-Leste ne'e "hanesan krime ida" tuir lei internasional.

"Ne'e hanesan vingansa no laiha utilidade, agora tempu atu la'o ba oin. Ikusmai, hafoin tinan 18, Austrália halo buat ida ne'ebé loos (asina tratadu petróleu no gas iha fulan-Marsu tinan ne'e). Simu elojiu sira ne'e, tanba merese duni, no la'o ba oin" konsidera.

ho Lusa


Comentários

Critério de publicação de comentários