Pájina aktualizada iha 10:28h, segunda-feira 22 Outubru

OMS konfirma eliminasaun hosi sarampu no kontrolu rubéola iha Timor-Leste

04 de Agosto de 2018, 07:06

Organizasaun Mundial Saúde (OMS) anunsia, iha loron-sesta ne'e, liuhosi komunikadu, katak Timor-Leste halakon ofisialmente sarampu iha nasaun no kontrola rubéola no síndroma hosi rubéola konjénitu, hodi kumpri objetivu sira ne'ebé maka previstu iha loron 2014.

Timor-Leste hanesan ona nasaun ida hosi nasaun rua sudeste aziátiku nian ne'ebé halakon ezisténsia hosi kazu sira sarampu nian iha rai laran, no nasaun seluk maka Koreia-Norte, no hanesan nasaun ida hosi nasaun neen iha rejiaun hanesan ne'ebé maka agora iha kontrolu kona-ba kazu sira rubéola nian.

"Kumprimentu hosi objetivu sira ne'e hatudu determinasaun no kompromisu hosi nasaun sira iha rejiaun ba saúde hosi feto sira no labarik sira no ba kobertura ida hosi saúde universal", hatete hosi Khetrapal Singh, diretora rejional hosi OMS nian iha Sudeste Aziátiku.

Timor-Leste ho Koreia-Norte hamutuk nune'e ho Butaun no Maldivas, ne'ebé iha tinan liubá sai ona hanesan nasaun sira iha rejiaun ne'ebé maka halakon sarampu.

Kona-ba kontrolu hosi rubéola no hosi síndroma rubéola konjénitu, Bangladexe, Butaun, Maldivas, Nepal, Srilangka no Timor-Leste hanesan nasaun sira hosi sudeste aziátiku ne'ebé maka hetan ona objetivu ne'e.

Anúnsiu ne'e halo hafoin enkontru ida hosi Komisaun Verifikasaun Rejional, ekipa ida hosi espesialista independente ne'ebé maka hasoru malu iha Nova Deli entre loron 31 Jullu to'o 02 Agostu.

Tuir komunikadu, Komisaun verifika ona katak Repúblika Popular hosi Koreia no Timor-Leste interompe transmisaun hosi sarampu durante tinan tolu resin ona.

Iha tinan 2014, OMS hosi Sudeste Aziátiku anunsia ona eliminasaun hosi sarampu no kontrolu rubéola nian no hosi síndroma rubéola konjénitu nian hanesan objetivu prinsipal ida, no hahú hosi momentu ne'ebá maka nasaun hamutuk 11 hosi rejiaun foti ona medida sira kona-ba asuntu ne'e.

Tuir komunikadu, medida sira ne'ebé halo parte maka reforsu hosi vasinasaun hasoru sarampu no rubéola, aumentu ba vijilánsia, harii rede sira laboratóriu sira nian no hametin alkanse no apoiu hosi rede sira ne'ebé harii tiha ona hanesan programa hodi halakon pólio.

Komisaun rekoñese mós "progresu maka'as" ne'ebé halo hosi nasaun sira hosi rejiaun iha tinan haat ikus ne'e.

Khetrapal Singh hatutan katak profisional sira iha rejiaun iha preparasaun di'ak liu ona no bele konfia iha infraestrutura sira.

"Ita la'o daudaun ba futuru ida ne'ebé furak liu no saudável ba ema tomak - futuru ida livre hosi moras sira ne'ebé maka bele kombate ho vasina sira, mate sira ne'ebé maka la presiza hodi akontese no sofrimentu sira ne'ebé maka bele mosu", hatutan hosi responsável.

"Sarampu daet lalais, no ita presiza atu book aan lalais tebes hodi proteje ita nia labarik sira hosi konsekuénsia sira ne'ebé todan", nia hakotu.

Labarik millaun 400 resin iha rejiaun sei hetan vasina iha tinan rua (2018-2019) lahó interupsaun.

Konkluzaun sira aprezenta iha komunikadu ho baze iha "análize klean ida hosi informasaun sira no relatóriu sira ne'ebé maka fó hosi komité sira ba verifikasaun nasional nian".

ho Lusa

 


Comentários

Critério de publicação de comentários