Pájina aktualizada iha 04:14h, tersa-feira 26 Setembru

Xanana Gusmão sei diriji ratifikasaun tratadu fronteira Tasi Timor nian

22 de Agosto de 2018, 14:43

Ex-Prezidente timoroan Xanana Gusmão nomeadu iha loron-tersa ne'e hosi Governu hanesan reprezentante espesial Timor-Leste nian hodi konklui prosesu ratifikasaun Tratadu fronteira maritima sira ho Australia, iha Tasi Timor.


Desizaun ne'e ho baze iha proposta ida primeiru-ministru Taur Matan Ruak nian, ne'ebé aprova iha loron-tersa ne'e iha Konsellu Ministru no konfirma mós katak Xanana mak sei lidera negosiasaun sira ba akordu konabá dezenvolvimentu posu Greater Sunrise nian.

Iha konkretu, Xanana Gusmão sei lidera prosesu ba ratifikasun "Tratadu entre Republika Demokrátika Timor-Leste no Australia ne'ebé maka estabelese fronteira maritima sira iha Tasi Timor" no mós "prosesu interese iha kampu petroliferu sira no selebrasaun akordu sira konabá dezenvolvimentu kampu petroliferu sira Greater Sunrise nian", esplika Governu.

"Reprezentante espesial ne'e sei reprezenta Estadu Timoroan iha kestaun sira hotu konabá Tratadu ne'e, negosia atu nune'e bele alkansa interese partisipativu sira iha posu petroliferu sira iha Tasi Timor, ne'ebé hein katak sei kontribui ho forma desiziva ba dezenvolvimentu indústria petrolífera moderna iha Timor-Leste no mós, ba dezenvolvimentu indústria sira seluk no setor ekonómiku sira ne'ebé ligadu", refere Governu timoroan, iha komunikadu.

Reprezentante Espesial ne'e mós sei lidera prosesu negosiasaun no selebrasaun ho Australia no ho empreza petrolifera sira akordu sira ne'ebé presiza ba dezenvolvimentu kampu sira Greater Sunrise nian, afirma fila fali intensaun Governu nian katak kampu Greater Sunrise nian bele dezenvolvidu liu hosi gazodutu ba costa sul Timor-Leste nian no konstrusaun no operasaun fabrika ida ba prosesamentu gaz natural iha Beasu", nota ezekutivu ne'e.

Iha loron 06 Marsu, Timor-Leste no Australia asina, iha Nova Iorke, istóriku "Akordu pakote ne'ebé inklui elementu sentral sira ba delimitasaun fronteira maritima sira entre nasaun rua ne'e iha Tasi Timor", dokumentu ne'ebé halo hafoin negosiasaun ho auspisiu Komisaun Konsiliasaun nian.

Dokumentu ne'e agora tenki ratifika fila fali hosi parlamentu nasaun rua ne'e, ne'ebé maka prosesu ne'e hahú ona iha Australia. Timor-Leste seidauk marka bainhira maka prosesu iha Parlamentu Nasional timoroan.

Prosesu ne'e mós obriga hodi finaliza akordu tranzisaun ba jestaun rekursu sira hotu ne'ebé mak agora daudaun esplora hela iha Tasi timor, ho jurisdisaun - no reseita sira - ne'ebé too agora ne fahe hela entra Timor-Leste no Australia no atu passa fali ba de'it Timor-Leste.

Sei falta atu too ba akordu "konabá termu komersial sira ba dezenvolvimentu Greater Sunrise nian", ne'ebé garante "kondisaun ne'ebé hanesan" ho empreza sira ba naran rejime ida ba Greater Sunrise, tuir kompromisu ne'ebé asume iha Tratadu Tasi Timor no Akordu Unitizasaun Internasional.

Kampu sira Greater Sunrise nian ne'e iha rezerva hamutuk gaz kúbiku trilliaun 5,1 ne'ebé maka situa iha tasi Timor nian, no 150 kilómetru besik sudeste Timor-Leste no 450 kilómetru besik noroeste Darwin, iha Australia.

Xanana Gusmão, atual prezidente Kongresu Nasional Rekonstrusaun Timoroan (CNRT), ne'ebé lidera Aliansa Mudansa ba Progresu (AMP), koligasaun ne'ebé manan eleisaun ikus ne'e ne'ebé mak sustenta Governu ne'ebé lideradu hosi Taur Matan Ruak, hosi Partidu Libertasaun Popular (PLP).

Ex-Prezidente no ex-xefe Governu ne'e mós nomeadu formalmente dala rua hosi atual xefe Estadu, Francisco Guterres Lu-Olo, hodi integra iha VIII Governu, maibé nia nega hodi simu tomada de pose tanba solidariariza ho membru sira seluk ne'e indijitadu no ne'ebé maka Lu-Olo la fó pose.

Xanana Gusmão maka negosiador prinsipal ekuipa Timor-Leste nian ne'ebé mak konklui, iha loron 30 Agostu 2017, base ba tratadu foun fronteira marítima sira ho Austrália, ne'ebé maka asina tinan ne'e iha Nova Iorque.

ho Lusa

 


Comentários

Critério de publicação de comentários