Pájina aktualizada iha 23:17h, kuarta-feira 21 Novembru

Orsamentu Timor-Leste nian ba tinan 2018 haruka ona ba PR hodi promulgasaun

11 de Setembro de 2018, 00:39

Parlamentu Nasional timoroan haruka iha loron-segunda ne'e ba Prezidente Republika dekretu referente ba Orsamentu Jeral Estadu niain (OJE) ba tinan 2018, ne'ebé aprovadu ho maioria iha semana kotuk no konsidera urjente hafoin besik fulan sia iha duodesimu.


Redasaun final OJE nian, preparada hafoin debate naruk ida iha espesialidade, konklui iha loron-segunda ne'e no dekretu, ne'ebé asina hosi prezidente parlamentu nian, Arão Noé Amaral, no ne'ebé maka agora tenki promulga hosi Francisco Guterres Lu-Olo, antes atu tama iha vigor.

Timor-Leste iha rejime duodesimu dezde 01 Janeiru no parte boot hosi orsamentu ne'e sei ezekuta iha trimestre ikus tinan ne'e nian, periodu ne'ebé maka Governu tenki prepara - ho debate parlamentar no sei promulga hosi xefe Estadu - orsamentu ba tinan 2019.

Fernanda Lay, deputada CNRT nian, prinsipal partidu koligasaun Governu nian no responsavel Komisaun Finansas Publikas Parlamentu Nasional nian hatete iha deklarasaun ba Lusa katak otimista Prezidente Republika sei promulga dokumentu ne'e.

"Hafoin esforsu sira ne'ebé Parlamentu Nasional halo, ha'u hanoin no hein katal Prezidente sei promulga. Ha'u fiar katak sei Promulga tanba hatene katak agora daudaun ita la iha osan. Rejime duodesimu ne'e dura besik tinan ida ita tenki rekupera fali ba normalidade OJE nian hodi bele iha investimentu", afirma.

Felisita OJE ne'ebé aprovadu iha tempu rekord, Fernanda Lay admiti katak bankada sira Governu nian la espera maioria ida ne'ebé boot a favor ba dokumentu ne'e no hatudu kofiante katak deputadu sira sei konta lolos gastu publiku sira.

"Ha'u fiar katak konta ezekusaun nian sei rigorozu tebes no ha'u sente ne'e di'ak. Primeiru-ministru mós defende katak iha nesesidade hodi hatun despeza sira ne'ebé desnesesariu no ida ne'e mós prokupasaun ne'ebé hatudu hosi deputadu sira hosi opozisaun. Ha'u sente di'ak sira halo ida ne'e", afirma.

Hanoin mós katak OJE ne'e aprovadu iha loron-sesta liubá hosi Parlamentu Nasional pratikamente ho 2/3 votu a favor (42 hosi 65) hafoin debate naruk iha espesialidade ne'ebé maka diskuti no vota proposta ba alterasaun testu ne'e hamutuk 100 resin.

Dokumentu ne'e haruka iha loron-segunda ne'e ba Prezidente Republika, Francisco Guterres Lu-Olo, ne'ebé maka agora iha másimu loron 30 hodi desidi se promulga ka veta diploma ne'e.

Dotasaun orsamental sira ba tinan ne'e inklui millaun 200,25 ba salariu no vensimentu sira, millaun 354 ba bens no serbisu, millaun 324,2 ba transferénsia publika sira, millaun 5,11 ba kapital menor no millaun 393,75 ba kapital dezenvolvimentu nian.

Total ba despeza serbisu sira nian sein autonomia administrativa no finanseira no órgaun autonomu sira sein reseita rasik hamutuk dolares millaun 830,54.

Total despeza serbisu nian no fundu autonomu sira iha tinan 2018, inklui mós despeza sira ne'ebé finansiada hosi emprestimu, hamutuk millaun 431,04, ho Autoridade Região Administrativa Especial de Oe-Cusse Ambeno (RAEOA) no Zona Especial de Economia Social de Mercado de Oe-Cusse Ambeno no Ataúro (ZEESM) sae iha orsamentu ida hamutuk dolares millaun 28.

Globalmente OJE ne'e prevé despeza total hamutuk dolares millaun 1.277,37, ho finansiamentu másimu ida hamutuk dolares millaun 61,6 finansiamentu ho rekursu ba endividamentu publiku.

Iha kofre sira Estadu nian tenki tama dolares millaun 188,8 reseita sira laos petroliferas, ne'ebé maka millaun 5,6 koresponde ba valor sira ne'ebé kobra hosi serbisu sira no fundu autónomu, inklui mós RAEOA no ZEESM ne'ebé maka soma millaun 44,4 saldu iha konta tezouru nian.

Diferensa - dolares millaun 982,5 -, koresponde ba levantamentu ne'ebé maka tenki halo iha Fundu Petroliferu, ne'ebé maka millaun 550,4 hosi Rendimentu Sustentavel Estimadu (RSE) fundu ne'e no sira seluk hanesan levantamentu adisional.

ho Lusa

 


Comentários

Critério de publicação de comentários