Pájina aktualizada iha 04:22h, tersa-feira 26 Setembru

Governu timoroan inklui dotasaun ba fabrika simentu nian iha Orsamentu Estadu nian

11 de Setembro de 2018, 23:22

Governu timoroan inklui dolares norte-amerikanu millaun 50 iha Orsamentu Jeral Estadu nian ba tinan ne'e, ne'ebé maka aprova iha loron-sesta ne'e, ba konstrusaun fabrika simentu nian ida besik sidade daruak, Baucau.


Dotasaun ne'e, iha ámbitu "akordu espesial investimentu selebradu ho TL Cement", ne'ebé maka foufoun la tama iha livru Orsamentu Jeral Estadu nian (OJE) ne'ebé entrega hosi Governu ba Parlametun Nasional, no ikus mai hatama no aprova durante debate iha espesialidade.

Projetu ne'e, investimentu privadu boot australianu nian iha Timor-Leste, afetadu tiha iha parte balun, tanba situasaun instabilidade politika iha Timor-Leste ne'ebé maka lori too eleisaun antesipada no obriga nasaun ne'e moris iha duodesimu dezde fulan Janeiru.

Maski tensaun hirak ne'e, inkluzaun ba abastesimentu ne'e iha konta OJE nian la iha votu kontra ida hosi opozisaun, ne'ebé maka defende investimentu ne'e hanesan prosesu importante iha diversifikasaun ekonomia nian.

"Fabrika TL Cement hanesan investimentu estratéjiku ida, ho osan privadu ida ne'ebé signifikativu, no investimentu boot dahuluk iha área laos-petrolífera. Investimentu ne'e sei kria vantajen no benefísiu barak ba ekonomia, promove diversifikasaun ekonomika no hamenus dependénsia reseita petrolífera," hatete xefe bankada partidu boot opozisaun nian, Frente Revolucionária do Timor-Leste Independente (Fretilin), Aniceto Guterres Lopes.

Dezeñu no projetu enjeñaria projetu nian konkluidu tiha ona, tuir TL Cement, seidauk avansa ho autorizasaun final ambiental no ba mina kalkariu.

Previzaun hatudu katak konstrusaun sentru formasaun no kais konstrusaun nian sei hahú tinan ne'e, no fabrika simentu no kais prinsipal sei aranka antes fulan Jullu 2019.

TL Cement antesipa saida simentu unidade nian ba dahuluk iha fulan Jullu 2021 no operasaun sei kompletu iha inisiu tinan 2022. Ho total, empreza ne'e prevé investimentu ida hamutuk dolares millaun 800, empregu diretu hamutuk rihun ida no indiretu hamutuk rihun tolu.

Projetu TL Cement nian sei iha kapasidade ba produsaun hamutuk tonelada 'clinker' simentu rihun lima resin lor-loron no inklui konstrusaun ponte-kais ida, pedreira, kompleksu industrial, parque enerjia eólika no solar, no sira selu tan.

Estudu sira ne'ebé realizadu iha tinan 2014 aponta ba ezisténsia ba rezerva boot kalkáriu nian ida iha rejiaun ne'e no bele dura too tinan 400.

Iha final fulan Novembru 2016, Konsellu Ministru VI Governu Konstitusional aprova asesu Estadu nian iha kapital sosial TL Cementu nian.

ho Lusa

 


Comentários

Critério de publicação de comentários