Pájina aktualizada iha 23:25h, kuarta-feira 21 Novembru

Ministra Edukasaun timoroan nian apoia espansaun Eskola Portugueza de Dili

13 de Setembro de 2018, 00:14

Ministra Edukasaun timoroan anunsia nia apoiu ba projetu espansaun Eskola Portugueza de Dili (EPD), ne'ebé maka simbolikamente hahú iha loron-kuarta ne'e tinan letivu no sei iha numeru alunu ne'ebé as, rihun ida liu.


"Ha'u hatene katak diresaun eskola nian iha intensaun hodi aumenta nian instalasaun sira no ha'u aproveita mós atu hatete, sira sei iha apoiu hotu hosi Ministeriu Edukasaun", afirma Dulce Soares iha loron-kuarta ne'e iha atu ida ne'ebé halao iha EPD.

"EPD no Ministeriu Edukasaun timoroan iha objetivu ne'ebé hanesan, ne'ebé maka oferese edukasaun ida ho kualidade, no tanba ne'e maka ami sempre serbisu hamutuk", afirma.

Acácio Brito, diretor eskola nian, konfirma prosesu espansaun ne'e - ne'ebé maka sei iha kustu total ida ho montante dolares millaun lima resin - ne'ebé maka lao hela, permiti aumenta halo barak tan kapasidade akollimentu alunu sira.

Projetu ne'e prevé konstrusaun pizu ida liu iha espasu edifisiu prinsipal, ne'ebé maka sei akomoda sala entre 15 no 20, konstrusaun sala multiuzu ne'ebé maka sei serve hanesan auditóriu no jinaziu no mós instalasaun kampu desportivu rua, no melloria sira seluk no alterasaun sira.

Tinan ne'e EPD sei iha alunu sira hamutuk na'in 1032, ho na'in 270 iha ensinu pré-eskolar, na'in 376 iha 1º siklu, na'in 131 iha 2º siklu, na'in 144 iha 3º siklu no na'in 121 iha ensinu sekundariu.

"Ida ne'e eskola portugueza ida ne'ebé serbisu ba Timor no relasaun maun-alin entre povu rua ne'ebé maka hakarak no iha ezersisiu ba soberania inkestionavel ida ne'ebé la iha odiu ba pasadu komum", afirma Acácio Brito.

José Pedro Machado Vieira, embaixador Portugal nian iha Díli, fó hanoin mós katak EPD hanesan "projetu referénsia ida ba Governu portuguéz" no hanesan "farol" ida iha setor kooperasaun iha area edukativa, ne'ebé "kontinua sai prioridade" ba atuasaun portugueza iha Timor-Leste.

"Edukasaun hanesan parte ida ne'ebé vizivel hosi kooperasaun portugueza no setor prioritariu atuasaun nian ida ba nasaun rua ne'e", hatete.

"Governu portuguéz apoia projetu barak ho signifikadu boot iha kualifikasaun ensinu nian iha Timor-Leste, ho grupu oioin, maibé kumpri propozitu hotu hodi apoia Governu Timor-Leste iha planu nasional hodi iha dalen portuguez hanesan lian ofisial", afirma.

Iha nia intervensaun, Dulce Soares rekomenda ba alunu sira aproveita oportunidade ne'ebé signifika estuda iha eskola "ho kualidade ne'ebé boot", tanba livru no manual sira disponibiliza gratuitamente ba estudante sira no nia hatete mós katak inan-aman sira bele aproveita hodi "aprende ho sira nian oan sira".

"Edukasaun oan sira nian labele entrega de'it ba profesor sira no alunu sira. Importante tebes akompaña ita nian oan sira. Ajuda ami, akompaña sira nian perkursu eskolar no le ho sira", afirma.

Ba finalista sira, Dulce Soares husik pedidu ida ba sira hodi esforsa no kontinua sira nian estudu universitariu no husu atu sira eskola too remata no kontribui ba dezenvolvimentu nasaun nian.

Timor-Leste presiza ema sira kualifikada, kontribui ba dezenvolvimentu nasaun ne'e", hatete, agradese mós ba dedikasaun profesor sira nian ne'ebé deslokadu hosi Portugal iha EPD.

ho Lusa

 


Comentários

Critério de publicação de comentários