Pájina aktualizada iha 23:49h, kuarta-feira 21 Novembru

Banco Central timoroan aprezenta keixa kontra prinsipal seguradora nasaun nian

14 de Setembro de 2018, 02:07

Banco Central Timor-Leste (BCTL) anunsia iha loron-kinta ne'e katak sira lori ba Ministeriu Publiku prosesu ida tanba suspeita ba fraude no fase osan kontra responsavel sira seguradora boot nian iha nasaun ne'e, NITL, hafoin sira deteta "iregularidade sira ne'ebé grave".


Iha komunikadu, BCTL esplika katak sira nian investigasaun ida deteta "iregularidade prosedimentais no finanseira sira ne'ebé barak no séria iha violasaun ba Lei Seguru nian, inklui mós desviu fundu sira, ne'ebé pratika hosi responsavel boot sira" NITL nian (National Insurance Timor-Leste).

La fó detalle ne'ebé klaru, BCTL esplika katak iregularidade sira deteta tanba denunsia ida ne'ebé simu iha tinan 2016.

"Hafoin simu informasaun ba rejultadu invetigasaun sira ne'e, NITL desidi ho la fó naran pasu ida hodi regulariza situasaun ne'e", esplika.

Tanba ne'e, iha fulan Novembru 2017 Konsellu Administrasaun BCTL nian halo investigasaun ida, ne'ebé nian konkluzaun maka aplikasaun multa no sansaun asesoria sira tanba infrasaun oioin.

BCTL esplika katak, entre iregularidade sira ne'e, konta mós ho "inkumprimentu dever hodi komunika ba BCTL kompozisaun órgauan administrasaun sira, estrutura asionista, akordu parasosiais sira no, iha jeral, faktu sensível sira hotu ne'ebé bele afeta kontrolu no governasaun sosiedade nian no modifikasaun sira".

NITL la observa regra legal sira "konabá manutensaun no respeitu ba kapital sosial minimu", impede ka taka supervizaun BCTL nian, fó "informasaun sensivel sira ne'ebé lalos hodi lori ba konkluzaun falsu ida ho efeitu ne'ebé hanesan ho prestasaun ba informasaun falsa sira" no subar tiha "situasaun insufisiénsia finanseira" empreza nian.

Rejista mós "aktu ba jestaun prejudisial sira ne'ebé ho intensaun", ezersisiu "ba atividade sira ne'ebé la integra objetu sosial sosiedade nian" no fornesimentu informasaun inkompletu no lalos ba BCTL.

Entre sansaun sira ne'e, BCTL aplika koima ida ho dolares rihun 755 resin ba empreza ne'e no koima total hamutuk dolares millaun 1,12 ba eis-membru no membru sira Konsellu Administrasaun no responsavel boot sira NITL nian.

Fó mós sansaun asesoria sira ne'ebé maka hanesan bandu, durante periodu tinan tolu, atu ezerse ba kargu sira iha sosiedade ho atividade seguradora ne'e.

Fó mós prazu fulan 3 ba asionista sira hodi halo restruturasaun asionista no sira nian Konsellu Admistrasaun nian, no suspende lisensa atividade seguradora nian durante periodu ne'ebé hanesan.

BCTL mós nomeia "Konsellu Administrasaun interinu" nian ida ne'ebé jere hela seguradora ne'e.

NITL hanesan sosiedade timoroan ida - okupa hosi sidadaun estrajeiru na'in rua no empreza ida iha Singapura - lisensiada dezde tinan 2010 hosi BCTL hodi ezerse atividade seguradora iha Timor-Leste.

Bainhira tama ba merkadu timoroan, NITL hanesan empreza boot iha setor seguru nian, konta ho kliente sira no inklui mós Governu timoroan rasik.

Fonte ne'ebé besik ba prosesu ne'e konfirma ba Lusa katak iregularidade ida ne'ebé deteta maka desviu fundu sira ne'ebé destinadu ba reseguradora ida hosi seguru sentral eletrika timoroan.

Komunikadu loron-kinta nian ne'e mosu hafoin responsavel NITL sira fahe karta ida ho akuzasaun kontra BCTL no nia responsavel sira, ne'ebé maka akuza "atake inimigu" ida empreza nian.

"Asaun sira BCTL nian kontra NITL no nian konsellu administrasaun hanesan inkonstitusional no/ka ilegal no/ka abuzu ba prosesu ida, tanba hanesan atake indireta ba tribunal Timor-Leste nian", lé iha karta ne'ebé asina ho "A Gastão" de'it.

"Aktu sira BCTL nian envolve mós violasaun notoria sira justisa natural", refere tan.

Karta ne'e levanta mós suspeita konabá Abessy Bento nian mate, prezidente no diretor ezekutivu NITL nian, iha loron 26 Maiu 2018, afirma mós katak ne'e hanesan "asasiniu ida" no sira mós refere katak iha "ameasa ne'ebé resente kontra membru sira administrasaun nian no diretoria NITL nian".

Iha karta ba "kliente no parseiru emprezarial sira", ne'ebé konsegue hosi Lusa, supostu responsavel NITL sira nian hatete katak sira halo tiha ona "revizaun estratéjika" ida seguradora nian no "lori ba desizaun hodi sai hosi merkadu seguru Timor-Leste nian ho efeitu imediatu".

Grupu ne'e hatete katak saída hosi Timor-Leste ne'e pretende "haforsa sira nian negosiu sira ba merkadu sira ne'ebé maka iha oportunidade ba kresimentu, iha ambiente ida ne'ebé fó estabilidade no seguransa regulatoriu, legal no politika ba investor sira".

Iha komunikadu loron-kuarta nian ne'e, BCTL refere katak nomeasaun administrador interinu nian ida ne'ebé hatudu katak "envezde atake inimigu" entidade ne'e "empeñada hela hodi NITL kontinua fornese servisu seguru nian iha Timor-Leste".

Esplika katak sira atua hela tuir lei Seguru nian, BCTL refere mós katak NITL "la notifika ka simu autorizasaun hodi taka atividade iha Timor-Leste".

ho Lusa

 


Comentários

Critério de publicação de comentários