Pájina aktualizada iha 11:27h, sabado 15 Dezembru

Parlamentu timoroan adia ba dala hat nomeasaun Komisaun Antikorupsaun

24 de Setembro de 2018, 23:09

Parlamentu Nasional timoroan adia iha loron-segunda ne'e, ba dala hat, eleisaun ba komisariu foun antikorupsaun nian, iha polémika nian klaran ne'ebé maka husik Komisaun Anti-Korupsaun (CAC), formalmente, la iha responsavel.


Deputadu hosi bankada opozisaun sira la marka prezensa iha loron-segunda ne'e momentu ne'ebé maka marka, iha ajenda ordem loron nian, eleisaun ba komisaun foun CAC nian hodi substitui Adérito Tilman, ne'ebé maka hotu tiha nia mandatu tinan hat nian iha fulan Jullu ne'e.

Lei ne'ebé vigora determina katak komisariu "dezignadu hosi Parlamentu Nasional, ho proposta Governu nian, ho maioria absoluta hosi deputadu sira", maibé obriga sira tenki prezente iha plenáriu "pelumenuz, deputadu sira tolu ka hat ne'ebé ativu iha sira nian funsaun".

Opozisaun insiste katak antes debate no votasaun iha plenariu tenki buka konsensu no kontesta faktu ne'ebé maka bankada sira Governu nian muda tiha pozisaun inisial ida konabá asuntu ne'e.

"Figura komisariu antikorupsaun tenki ser figura konsensual, ne'ebé propostu hosi Governu no desididu hosi parlamentu tenki ser konsensual, hodi defende interese Estadu nian iha kombate ba korupsaun", hatete Francisco Branco, hosi Fretilin.

"Tenki iha konsentrasaun entre bankada sira. Kestaun ida ne'e la iha ligasaun ho interese grupu nian ka partidu nian. Ida konabá interese sira Estadu nian", refere.

Bankada sira Governu nian defende katak eleisaun sei liu hosi aprezentasaun pelumenuz kandidatu na'in rua.

Iha faze ba dahuluk, Lusa rona hosi deputadu sira hosi bankada oioin katak, sira too tiha iha konsensu ida konabá rekondusaun kargu Adérito Tilman nian.

Primeiru-ministru Taur Matan Ruak rasik, asiste aprovasaun iha Konsellu Ministru iha loron 11 Jullu proposta ida ba nian estensaun mandatu Tilman nian.

Bainhira proposta ne'e too iha Parlamentu, bankada sira Governu nian rasik mós defende katak tenki aprezenta pelumenuz kandidatu na'in rua.

Iha loron 20 Jullu, iha Konsellu Ministru, Taur Matan Ruak aprezenta proposta foun ida akresenta tan ba lista kandidatu sira Sérgio Hornai nian naran, atual responsavel defensoria publika nian.

Francisco Vasconcelos, deputadu Partidu Libertasaun Popular (PLP), partidu ida ne'ebé mós integra iha Aliansa Mudansa ba Progresu (AMP), koligasaun Governu nian, lamenta iha deklarasaun ida iha Parlamentu iha loron-segunda ne'e katak eleisaun la akontese fali ona.

"Ida ne'e asuntu Estadu nian ne'ebé maka iha importánsia ida ne'ebé boot. Ha'u lamenta saida maka akontese ne'e", hatete iha plenariu loron-segunda ne'e.

Deputadu sira Frente Revolusionária Timor-Leste Independente nian (Fretilin), forsa boot opozisaun, kestiona ho alterasaun ba pozisaun no insiste katak ideal ba kargu ne'e maka "buka konsensu" ida.

Adérito Tilman, ne'ebé maka asume funsaun hanesan komisariu CAC nian iha loron 15 Jullu 2014, konklui nia mandatu iha loron 15 Jullu liu ba, ne'ebé maka ho atrazu sira iha eleisaun ne'e, funsaun sira ne'e "paradu" hela.

Fó hanoin mós katrak lei ne'e determina mandatu komisariu nian "para automatikamente", ho mós kriteriu sira seluk, "hosi nia termu".

Lusa la konsege hetan komentariu ida hosi Adérito Tilman.

Komenta iha loron-segunda ne'e konabá asuntu ne'e, no la tama iha "pormenor sira", Sergio Hornai hatete katak nia naran propostu hosi bankada sira Governu nian maibé ideal maka "buka konsensu" ho bankada sira seluk.

"Ha'u ne'e soldadu ne'ebé prontu ba serbisu bainhira presiza. Ha'u la halo lóbi, ka buat ruma. Ne'e laos konabá ha'u nian kargu maibé konabá interese nasional no interese sira Estadu nian", hatete.

ho Lusa

 


Comentários

Critério de publicação de comentários