Pájina aktualizada iha 09:59h, kuarta-feira 24 Outubru

Prezidente timoroan promulga OE tinan 2018 nian no hakotu fulan sia duodésimu nian

27 de Setembro de 2018, 23:49

Prezidente-da-Repúblika Timor-Leste nian promulga iha loron-kinta ne'e Orsamentu Jerál Estadu nian (OJE) ba tinan 2018, no hakotu periodu fulan sia aplikasaun rejime duodésimál ne'ebé maka kontribui ba frajiliza ekonomia nasaun nian.


Francisco Guterres Lu-Olo asina desizaun promulgasaun OJE nian ne'e, no haruka ba Parlamentu, antes nia enkontru semanal ho primeiru-ministru, Taur Matan Ruak.

Tanba tensaun politika ne'ebé marka iha tinan ikus ne'e iha Timor-Leste, ne'ebé maka lori ba konvokasaun eleisaun antesipada, nasaun ne'e moris ho rejime duodésimal dezde loron 01 Janeiru, no husik konta sira Estadu nian, dala barak, besik ba interupsaun.

Ezemplu ida maka fornesimentu kombustivel ba sentral elétrika sira nasaun nian, ne'ebé maka dala barak iha tiha risku.

Orsamentu ne'ebé aprovadu hosi Parlamentu ho karáter urjénsia nian, haruka ba xefe Estadu iha loron 11 Setembru.

Partidu sira ne'ebé intergra iha Aliansa Mudansa ba Progresu (AMP), koligasaun Governu nian, kritika tanba demora xefe Estadu nian iha desizaun konabá konta públika sira. Konstituisaun fó ba Prezidente loron 30 hodi analiza OJE.

Orsamentu ho valor dolares millaun 1.279,6 no engloba reseita sira no despeza sira Estadu nian no Seguransa Soasial Timor-Leste nian entre loron 01 Janeiru no 31 Dezembru 2018.

Governu nian espektativa maka konsegue ezekuta dolares millaun 700 resin iha trimestre ikus tinan ne'e nian.

Dotasaun orsamental sira ba tinan ne'e inklui dolares millaun 200,25 ba salariu no vensimentu, millaun 354 ba bens no serbisu, millaun 324,2 ba transferénsia publika sira, millaun 5,11 ba kapital menor no millaun 393,75 ba kapital dezenvolvimentu nian.

Total despeza serbisu sira ne'ebé la iha autonomia administrativa no finanseira no órgaun autónomu sein reseita rasik maka dolares millaun 830,54.

Iha kofre sira Estadu nian tenki tama fali dolares millaun 188,8 resita sira laos petrolíferas sira nian.

Diferensa dolares millaun 982,5, koresponde ba levantamentu ne'ebé maka halo iha Fundu Petrolíferu, ne'ebé maka millaun 550,4 Rendimentu Sustentável Estimadu nian no sira seluk levantamentu adisional sira nian.

ho Lusa

 


Comentários

Critério de publicação de comentários