Pájina aktualizada iha 11:57h, sabado 15 Dezembru

MNE japonéz halo vizita 24 oras ba Dili hodi analiza relasaun bilateral sira

09 de Outubro de 2018, 21:18

Ministru Negosius Estranjeirus japonés inaugura iha loron-sesta ne'e ponte foun ida iha Dili, durante vizita ida ne'ebé maka halo ba Timor-Leste no ne'ebé maka sei asina akordu foun ida kooperasaun nian, hatete fonte sira Governu timoroan nian iha loron-tersa ne'e.


Taro Kono inaugura ponte foun iha mota Comoro, iha zona osidental kapital timoroan nian, Dili, oferta hosi Governu japonés.

Ponte ne'ebé maka loke ba publiku dezde loron 13 Setembru, ho kustu besik dolares millaun 26 no permite ligasaun alternativa ida ba zona ida ho espansaun boot sidade nian.

Ho komprimentu metru 249 no ligasaun entre mota sorin ba sorin ne'ebé maka ho total kilómetru 3,2, obra ne'e inklui mós estrada ida besik zona Tasi Tolu no ligasaun foun ida ba rotunda aeroportu Nicolau Lobato, ne'ebé maka sei halao hela.

Tuir fonte sira ezekutivu nian, sei asina akordu foun ida entre ajénsia de kooperasaun japonesa (JICA) no Institutu Nasional de Administrasaun Públika (INAP) timoroan.

Apoiu ba formasaun no kapasitasaun rekursu umanu hanesan elementu sentral kooperasaun japoneza nian ida ho Timor-Leste, liu-liu hosi projetu Bolsa Dezenvolvimentu Rekursu Umanu nian (JDS, sigla ho lian inglés).

Tuir kooperasaun japoneza, objetivu projetu JDS nian, ne'ebé maka agora ne'e implementa hela iha nasaun 15, hodi "apoia dezenvolvimentu rekursu umanu iha nasaun sira ne'ebé maka simu ajuda japonés, liu hosi funsionariu governamental sira no sira seluk".

Objetivu maka fó bolsa ba formandus timoroan sira hodi ba estuda iha universidade japoneza sira hodi hetan "koñesimentu ne'ebé espesializadu, halo peskiza sira no halo rede sira" kontaktu nian.

Durante vizita 24 oras iha Dili, Taro Kono reuné, ho Prezidente da Repúblika, Francisco Guterres Lu-Olo, ho primeiru-ministru, Taur Matan Ruak no ho ministru dos Negósius Estranjeirus interinu, Agio Pereira.

Deslokasaun xefe diplomasia japoneza nian ba Timor-Leste, insere iha vizita boot ida ba rejiaun, ne'ebé maka inklui mós pasajen hosi Australia no Nova Zelândia no mós participasaun iha reuniaun anual sira FMI nian, ne'ebé maka sei halao iha Bali, Indonézia.

ho Lusa

 


Comentários

Critério de publicação de comentários